Kryeministri i Kosovës, Isa Mustafa, ka “prodhuar” një tjetër “Zajednicë”, jo me firmë por me gojë, jo etnike, por dhe fetaro-etnike. Ai ka deklaruar se “Kosova ka marr për obligim ta njeh kishën ortodokse serbe dhe ta respektoj emrin e saj”.
Ky deklarimi i shefit të qeverisë së Prishtinës u bë gjatë një takimi të tij me mediat, ku foli për anëtarësimin e Kosovës në UNESCO.
“Në javën e dytë të nëntorit në konferencën që do të mbahet do të vendoset për Kosovën. Presim që vendet ta votojnë anëtarësimin”, tha Mustafa, duke kaluar më pas në kampin tjetër, atë të “Zajednicës” fetare e trashëgimore të Serbisë: “Kosova është shtet demokratik. Kosova është zotuar duke dhënë garanci të kishës ortodokse serbe.
As Serbia dhe askush nuk fiton nëse Kosova mbetet e izoluar. Kosova ka marrë për obligim ta njeh kishën ortodokse serbe dhe ta respektoj emrin e saj”.
Por këto deklarime të Isa Mustafës, edhe pse mikluese, nuk prodhojnë asnjë efekt tek Beogradi, i cili është në një fushatë të ethshme për ta penguar anëtarësimin e Kosovës në UNESCO. /tesheshi.com/
