Pasi Holanda të nisë kontrollin e sërishëm të pasaportave në kufijtë e saj më 9 dhjetor, ajo do të jetë shteti i tetë anëtar i Bashkimit Evropian, pra shteti i nëntë i Shengenit, që zbaton kontrollin kufitar, raporton Anadolia.
Konkretisht, Austria, Gjermania, Danimarka, Franca, Suedia, Sllovenia dhe Italia aplikojnë kontrollin e kalimit të kufijve të tyre në Bashkimin Evropian. Përveç tyre, Norvegjia, e cila është anëtare e Shengenit, ka kthyer përkohësisht kontrollin e kufijve të saj.
Rritja e incidenteve
Ndër arsyet janë presioni i madh dhe kumulativ në sistemin e migracionit, veçanërisht për pritjen e azilkërkuesve. Si arsye përmendet shtimi i incidenteve kriminale në qendrat e pritjes.
Rivendosja e kontrollit kufitar sipas rregullave të Shengenit nuk mund të jetë më e gjatë se gjashtë muaj në vazhdimësi, ndaj shtetet anëtare të BE-së dhe Shengenit marrin vendime për zgjatjen e tyre çdo gjashtë muaj.
Prandaj, shumica e vendeve anëtare të BE-së, d.m.th. Shengen, që kanë rikthyer kontrollet në kufijtë e tyre, e kanë bërë këtë deri në gjysmën e parë të vitit 2025. /tesheshi.com/
