E shtuna dhe e diela e 28 dhe 29 nëntorit shpërfaqi faktin se mes Ramës dhe Metës është shuar dhe e fundit grimcë komunikuese, ajo me tipare korteziale, apo thënë ndryshe zyrtare, të cilën, dy personazhet nën një përplasje të ashpër me njëri-tjetrin, gjithsesi e ruanin në momente të veçanta.
Një ditë më parë në Vlorë, në Sheshin e Flamurit, e një ditë më pas te Nëna Shqipëri, Rama e Meta nuk kanë këmbyer as përshëndetje mes tyre, ndryshe nga ajo që muaj më parë luajtën COVID me një 
përshëndetje alla pandemike.
Në fillimet e krizës, apo ndryshe në valën e parë nga marsi deri në maj, Rama iu përgjigj rregullisht ftesave të Metës për një diskutim mbi krizën, duke u vlerësuar madje takimet për frymën bashkëpunuese.
Madje Rama doli në mbrojtje të Metës pas një turi të këtij të fundit pranveror mal më mal, në kushtet kur pjesa tjetër e shoqërisë vijonte në karantinë. “Ia do detyra”, qe arsyetimi i të parit të qeverisë.
Por që nga vera, Meta nisi të ndryshojë kurs; u ashpërsua sërish në gjuhë, deri sa mbërriti te “qen bir qeni” për Ramën.
Pos kësaj, Meta nisi ta sulmojë të parin e qeverisë dhe nga i ati i ndjerë, një tabiat mbi 20-vjeçar i Berishës. Për Metën, ai është “i biri i Kristaqit që ka çuar në litar Havzi Nelën”.
E këtë të dielë, nën hijen e veprës monumentale të Kristaq Ramës – “Nëna Shqipëri” – Rama e Meta shpërfaqen shuarjen e çdolloj komunikimi mes tyre. /tesheshi.com/
