Vetëvendosje dhe kreu i saj, Albin Kurti, kanë marrë një goditje të madhe pasi iu është larguar Shpend Ahmeti, një prej njerëzve më të fuqishëm vitet e fundit në këtë parti, duke qenë njehërësh dhe në pozita qeverisëse, si kreu i Komunës së Prishtinës.
Ahmeti, përmes një letre të dërguar mediave ka njoftuar se ka dhënë dorëheqje nga të gjitha postet që ka mbajtur në Vetëvendosje.
Ai ka thënë se javëve të fundit ka kuptuar shumë gjëra për të cilat është shprehur se nuk i ka ditur më parë, dhe nga ato ka mësuar, kanë ardhur në përfundimin se VV-ja, nga ato që kanë ndodhur, nuk i përket më atij. Ose ai nuk i përket më VV-së.
Nga letra e tij e gjatë, një apologji e vetes në Vetëvendosje, kemi shkëputur pjesën ku ai sqaron arsyet e largimit.
“Sikurse edhe ju, qytetarë të nderuar, muajt e fundit kam vëzhguar një debat me dëme të pariparueshme për Levizjen Vetëvendosje të cilin as armiqët më të mëdhenj të LVV e të shtetit nuk do të mund as t’a dizajnonin e as imagjinonin. Ende sot nuk po mund të besoj se ky debat ka ndodhur në mes të njerëzve që deri dje kanë qenë të gatshëm të vdesin për njëri tjetrin.
Javëve të fundit kam kuptuar shumë gjëra për organizatën të cilat nuk i kam ditur më parë. Këto gjëra nuk janë diskutuar me mua. Mirëpo kjo nuk është arsyeja e vendimit tim. Motivi i vendimit tim sot është se arsyeja për të cilen unë kam hyrë në LVV nuk është më. Mospajtimet kanë dëmtuar frymën, besimin dhe rrjedhimisht edhe kauzën. Nuk besoj më se organizata në gjendjen që është sot është rruga më e shpejtë për ndryshim, së paku jo në përputhje me qëndrimet dhe besimet e mia. Nuk do të mundohem të tregoj se unë e kam mire, e të tjerët e kanë keq. Thjesht kjo qasje dhe kjo mënyrë e zgjidhjes së mospajtimeve nuk më përfaqësojnë mua. Kjo nuk do të thote se pajtohem me njërin krah ose tjetrin sa i përket të vërtetes për të kaluarën. Aspak. Nuk kam qenë pjesë e asnjërës nga temat për të cilat ka ndodhur mospajtimi fillestar. Prandaj nuk e ndjej betejën njejtë si ata.
Jam munduar personalisht të luaj një rol ndërmjetësuesi për tejkalim të problemeve, por shpejt e kam kuptuar që dallimet ishin tepër të thella. Kam shkuar në mbledhjet e fundit të Këshillit dhe kam marrë pjesë në procesin zgjedhor gjithmonë me shpresë se do të mund të tejkalohen dallimet. Por ja që kjo ishte e pamundur.
Ndoshta rrugët na bashkohen prapë, por për mua tashmë me arsye, kushte e metoda tjera”, shprehet ndër të tjera Shpend Ahmeti. /tesheshi.com/
