Duke e klafisikuar si ditën më të vështirë të karrierës së tij politike, kreu i Vetëvendosjes, Visar Ymeri ka dhënë dorëheqjen nga drejtimi i lëvizjes
“Unë po jap dorëheqje, si akt zhgënjimi që nuk kam arritur që t’i ndalë linçimet dhe përbuzjet që kanë ndodhur kohëve të fundit brenda organizatës. Ka pasur një shpërfillje ndaj pozitës time dhe organeve tjera të lëvizjes. Shpresoj që dorëheqja ime të kuptohet si alarm, veçanërisht për ata që kanë qenë pjesë e linçimit”, ishte deklarimi i Ymerit në një konferencë për shtyp.
Këtë akt ai e paralajmëroi ditë më parë gjatë një interviste televizive, si formë e mënyrë për të rivënë rregull në parti. E tani kjo ka ardhur realisht.
Dorëheqja e Visar Ymerit e bën dhe më të thellë krizën në Vetëvendosje, ardhur çuditërisht e paradoksalisht pas një suksesi të jashtëzakonshëm elektoral në zgjedhjet lokale.
Pas disa javësh, VV mbledh kongresin e saj ku do zgjidhet kreu i ri, e ku do kandidojë Albin Kurti, njeriu që e ideoi, themeloi dhe e faktorizoi këtë lëvizje, për t’ja lënë një ditë drejtimin Visar Ymerit, tashmë të dorëhequr. /tesheshi.com/
