Presidenti turk Rexhep Tajip Erdogan do të takohet me homologun e tij rus Vladimir Putin më 5 gusht në Soçi të Rusisë, njoftuan presidenca turke dhe zëdhënësi i Kremlinit Dmitry Peskov.
Sipas agjencisë ruse të lajmeve Interfax, duke cituar Peskov, të dy udhëheqësit do të diskutojnë problemet rajonale dhe marrëdhëniet dypalëshe.
Të dy liderët u takuan për herë të fundit më 19 korrik në Teheran, tre ditë përpara nënshkrimit të një marrëveshjeje midis Moskës, Kievit, Ankarasë dhe Kombeve të Bashkuara për të rifilluar tregtinë e grurit ukrainas përmes Detit të Zi, e cila ishte ndalur pas fillimit të pushtimit rus të Ukrainë.
Qendra e përbashkët e koordinimit (JCC) për rifillimin e eksporteve të grurit pritet të hapet me një ceremoni në Stamboll të mërkurën, njoftoi më herët sot Ministria e Mbrojtjes e Turqisë.
Takimi befasues Erdogan-Putin në vendpushimin e Soçit në Detin e Zi vjen gjithashtu pasi presidenti turk ka kërcënuar që nga maji se do të nisë një ofensivë në verilindje të Sirisë për të krijuar një zonë sigurie 30 km përgjatë kufirit të vendit për të mbajtur larg kurdët.
Partia e Punëtorëve të Kurdistanit (PKK) është cilësuar si organizatë terroriste nga Turqia, Shtetet e Bashkuara dhe Bashkimi Evropian.
Në Teheran, Erdogan u shfaq i vendosur për të kryer këtë sulm, pavarësisht kundërshtimeve të përsëritura nga presidenti Putin dhe presidenti iranian Ebrahim Raisi, të cilët mbështesin milicitë në rajon.
Megjithatë, tre krerët e shteteve nënshkruan një komunikatë të përbashkët duke mbështetur në heshtje Ankaranë, duke thënë se ata “refuzojnë të gjitha nismat e paligjshme të vetëvendosjes”.
Ata treguan “gatishmërinë e tyre për të kundërshtuar aspiratat separatiste që mund të minojnë sovranitetin dhe integritetin territorial të Sirisë” dhe të kërcënojnë sigurinë e vendeve fqinje me “sulme dhe inkursione ndërkufitare”. /tesheshi.com/
