Pas kreut të Prishtinës, Shpend Ahmeti, nga Lëvizja Vetëvendosje është larguar edhe deputetja Besa Baftiu e cila ka dhënë dorëheqje nga të gjitha funksionet që ka mbajtur në këtë parti, si kryetare e Qendrës në Gjilan dhe anëtare e Këshillit të Përgjithshëm.
Ajo ka thënë se organizatës i janë bashkuar individë me mendësi që promovojnë të kundërtën e asaj që Vetëvendosje e ka për qëllim dhe se tani aty sheh pengesa për diskutime të sinqerta.
Gjithashtu, Baftiu ka shtuar se kohëve të fundit nuk ka parë vullnet as te kryetari Albin Kurti që të parandalojë problemet dhe linçimet e fundit të cilat ndodhën.
“Brenda organizatës sonë ishin afruar individë me një mendësi që promovon të kundërtën e asaj që promovon publikisht Vetëvendosje. Në vend që të hapej debati për të ardhmen e organizatës, përpjekja për ta mbytur kritikën dhe reflektimin e domosdoshëm, bashkë me gjuhën akuzuese e me tendenca dashakeqe u rritën. Kësisoj, gjatë kësaj kohe kemi parë fushatë të egër linçuese ndaj gjithë atyre që shprehnin pakënaqësi me gjendjen e krijuar, duke dëshmuar se brenda organizatës po i hapej rrugë një mendësie të rrezikshme totalitare, e cila nuk duron kritikën dhe mendimin ndryshe. Personalisht, jam munduar që të japë kontribut për aq sa kam pasur hapësirë për të mos lejuar një gjë të tillë, duke dashur të ruhen vlerat që i kemi promovuar në vazhdimësi, por tashmë një gjë e tillë më duket e pamundur. Sidomos pasi që përgjatë kësaj kohe, nuk kam parë vullnet as tek Kryetari i Lëvizjes, z. Albin Kurti, që ta parandalojë këtë lloj mendësie që i kanosej organizatës dhe e cila duket se po zë vend brenda saj”, thotë Baftiu.
Ajo nuk tregon nëse do mbetet deputete e pavarur dhe nëse do t’i bashkohet grupit anti-Kurti të cilët kanë parlajmëruar themelimin e një partie të re, apo nëse do i bashkohet ndonjë partie tjetër. /tesheshi.com/
