Ambasadorja e Kosovës në Uashington, Vlora Çitaku dhe ministri i Jashtëm serb Ivica Daçiç janë përplasur ashpër në mbledhjen e Këshillit të Sigurimit të OKB-së.
E gjitha nisi kur diplomati serb ngacmoi ambasadoren Çitaku duke mohuar shtetësinë e Kosovës.
“Populli shqiptar e ka shtetin e vet, kosovarët nuk kanë shtet sepse nuk janë komb. Çitaku nuk është kosovare, por shqiptare”, ka thënë Daçiç.
Por reagimi i Çitakut nuk vonoi duke i thënë Daçiçit se Kosova është e pavarur dhe kjo nuk do të ndryshojë më, por Serbia duhet të reflektojë.
“Mohimi i shtetësisë pse jam shqiptare e nuk jam kosovare, i kam dëgjuar këto. A i bie kjo që unë duhet të shkoj në Shqipëri? Kosova është shtet që i përket të gjithë qytetarëve të saj. Askush më nuk mund të më thotë se pasi jam shqiptare, nuk meritoj të jetoj aty. Kemi jetuar aty me shekuj. Pavarësia e Kosovë e shpallur si e tillë në vitin 2008 është kompromisi. Propozimi i Ahtisarit është kompromisi. Tash kompromisi qenka kthyer në qëndrim? Kjo nuk është e pranueshme”, u kundërpërgjigj Çitaku.
Një tjetër përplasje ndodhi edhe kur politikani serb mohoi që Serbia të ketë kryer gjenocid mbi popullin e Kosovës, ndërsa tha se “drejtësia në Kosovë nuk është në gjendje ose nuk dëshiron” që të procedojë kryerësit e krimeve mbi serbët”.
Mirëpo Çitaku ju kundërpërgjigj duke thënë se “Serbia në historinë e saj do të mbahet mend me Sllobodan Millosheviqin dhe Vojislav Sheshelin si kriminelët më të këqij në Evropë pas Luftës së Dytë Botërore”.
Më tej Çitaku tha se “UÇK-ja i ka mbrojtur shtëpitë e tyre dhe nuk ka shkuar të luftojë në Beograd“, ndërsa shtoi se i mbetet Serbisë që të ndryshojë dhe ta pranojë realitetin, të paktën për hir të fëmijëve të tyre.
Daçiç, në fjalën e tij ka akuzuar Kosovën edhe për dëbimin e serbëve, me ç’rast ka përmendur disa shifra që dikur serbët jetonin në qytetet e Kosovës, duke i krahasuar me numrin e tanishëm që ata jetojnë.
Megjithatë, përgjigjja e ambasadores sonë në SHBA ka qenë e menjëhershme dhe me argumente.
Ajo i ka paraqitur shifrat e serbëve që kanë votuar në zgjedhjet e 11 qershorit, duke thënë se ky numër tejkalon 100 mijë serbë.
Çitaku i ka paraqitur të gjitha shifrat me radhë për secilën komunë ku jetojnë serbët, duke i hedhur poshtë me argumente pretendimet e Daçiçit.
Përgatiti: Blendi Gashi – /tesheshi.com/
