Konfederata Aziatike e Futbollit (AFC) ka njoftuar se kampionati kontinental i vitit të ardhshëm do të organizohet nga Katari pasi Kinës iu hoq pritja për shkak të zbatimit të vazhdueshëm të masave të rrepta kundër përhapjes së koronavirusit, raporton Reuters.
Krahas Katarit, i cili do të presë Kupën e Botës nga 20 nëntori deri më 18 dhjetor të këtij viti, kandidate për të zëvendësuar Kinën ishin edhe Koreja e Jugut dhe Indonezia.
“Aftësitë e Katarit si organizator i ngjarjeve të mëdha sportive dhe aftësia e tij për t’i kushtuar vëmendje detajeve admirohen në mbarë botën. Me infrastrukturën ekzistuese të klasit botëror, si dhe me aftësitë e nivelit më të lartë si mikpritës, ne kemi besim se Katari do të shfaqë një spektakël të denjë për prestigjin që ka ky kompeticion”, tha Shaikh Salman bin Ebrahim Al Khalifa, President i AFC.
Kupa e futbollit aziatik, e cila është zhvendosur në fund të vitit 2023, në vend të datës fillestare në qershor dhe korrik, do të ketë 24 ekipe kombëtare.
Oferta e Koresë së Jugut për të pritur nuk u ndihmua nga fakti se Kupa e Azisë u mbajt për herë të fundit në atë vend në vitin 1960, ndërsa Katari priti në 1988 dhe 2011.
Duke qenë se Katari ishte një nga tre kandidatët për të pritur Kupën e Azisë në vitin 2027, Komiteti Ekzekutiv i AFC e zvogëloi numrin e pritësve të mundshëm të garës në dy – Arabinë Saudite dhe Indinë – pas këtij vendimi.
Titullin e kampionit të Azisë e mbron kombëtarja e Katarit. /tesheshi.com/
