Shtohen zërat në familjen e LDK-së që kërkojnë nga kreu i tyre Isa Mustafa që t’i largojë nga institucionet përfaqësuesit e Listës serbe.
Pas deputetit Arben Gashi, së fundmi një kërkesë të tillë e ka paraqitur edhe Vjosa Osmani kundërshtarja më e ashpër e Isës.
Ajo në një deklarim për mediat kosovare kritikon qeverinë që udhëheqet nga partia e saj për mungesë të ideve dhe propozimeve për integrimin e veriut.
“Është momenti i fundit që qeveria e Kosovës, të largojë nga qeveria përfaqësuesit e Listës serbe dhe të përfshijë në qeveri SLS në partinë e z. Petroviq, deputet e së cilës vazhdimisht kanë punuar në përputhje me kushtetutën e vendit dhe kanë dhënë kontributin e tyre në përfaqësimin e qytetarëve të Kosovës… Natyrisht që veriu që nga pas lufta, sidomos pa pavarësisht në vitit e 2008, vazhdimisht ka qenë çështja më sfiduese në aspektin e integritetit territorial dhe sovranitetit të vendit. Mirëpo, politika jonë nuk duhet të jetë vetëm reaktive, të presin se çfarë politike të re, çfarë provokimi të ri po bën Beogradi dhe në bazë të saj të determinohet dhe agjenda e bisedimeve me Serbinë. Qeveria e Kosovës dhe institucionet e Kosovës duhet të jenë shumë më aktive me ide me propozime të qarta lidhur me integrimin e veriut të vendit, me shtrirjen e sovranitetit në atë pjesë, por mbi të gjitha me projekte të qarta ekonomike të cilat i bëjnë bashkë qytetarët në veri dhe qytetarët në jug dhe integrojnë të gjitha komunitetet”, thotë Osmani.
Ndryshe, deputetët Gashi e Osmani dikur ishin njerëzit më të afërt të Mustafës por sot ata sipas rapoprtimeve nuk flasin me liderin e tyre.
E gjitha ka ardhur pasi që deputetët e cekur nuk e dhanë votën e tyre për koalicionin qeverisës PDK-LDK, pasi fuqishëm pohuan se partia e tyre dëmtohet nëse bashkëkqeveris me partinë e drejtuar atë kohë nga Thaçi. /tesheshi.com/
