Kandidati i Vetëvendosjes për kryeministër, Albin Kurti, ka dhënë një tjetër intervistë për mediat serbe, ku ka folur për ushtrinë, dialogun me Serbinë e formimin e qeverisë.
Pas intervistës në “Veçernji novost”, Kurti ka folur edhe për gazetën “Blic”, me ç’rast ka thënë se Kosova duhet të ketë një ushtri prej 20 mijë pjesëtarësh, pasi sipas tij, rreth një për qind e popullsisë duhet të jetë e përfshirë në ushtri.
Kurse për dialogun me Serbinë, ka thënë se bisedimet zhvillohen për çështjeve të brendshme të Kosovës, prandaj, sipas tij, rezultati nuk mund të jetë i drejtë.
“Ky dialog krijon përshtypjen e normalizimit të marrëdhënieve, por në fakt vetëm ka thelluar ndarjen etnike. Ne nuk jemi kundër parimit të dialogut, por kundër një dialogu që Serbia përcakton rendin e ditës dhe temat. Serbia duhet të përmbushë një numër kushtesh për shkak se ajo i detyrohet shumë për Kosovën”, ka thënë Kurti.
Ndërsa për qeverinë e re, Kurti ka thënë se nuk mund të ketë ekzekutiv të ri, me regjim të vjetër, duke aluduar këtu në koalicionin e PDK-AAK-NISMA, të cilët kanë fituar të drejtën për formimin e qeverisë, pasi kanë dal si grupacioni më i votuar në zgjedhjet e 11 qershorit. /tesheshi.com/
