Kriza në politikën shqiptare vijon të trazojë dhe atë gjermane. Mesazhi më i fundit i ardhur nga Berlini është ai i deputetit dhe anëtarit të kryesisë së CDU-së, Olav Gutting.
Më së pari, ai apelon për kujdes në dhënien e mesazheve apo këshillave mbi atë çfarë ndodh në politikën e Tiranës, duke konkluduar më pas në mospranimin e djegies së mandateve si kartë politike, pasuar nga akte dhune.
“Ne duhet të jemi të ndjeshëm në mesazhet që dërgojmë nga Gjermania në Shqipëri. Problemet e brendshme janë shqetësuese, por ne duhet të jemi të kujdesshëm në këshillat që i japim Shqipërisë, për shembull në lidhje me datën e zgjedhjeve. Ne vetëm mund të themi se largimi nga parlamenti dhe hedhja e molotovëve nuk është një mundësi. Kjo madje është e gabuar dhe nuk përputhet me vlerat tona. Mosmarrëveshjet politike duhet të zgjidhen përmes dialogut dhe debateve parlamentare, jo përmes luftimeve në rrugë”, shprehet Olav Gutting.
Edhe pse i djathtë, Gutting përcjell konsiderata jo të drejtpërdrejta mbi qeverisjen në Shqipëri, referuar dhënies së rekomandimit për hapjen e negociatave.
“Ne duhet të përshëndesim përparimin e Shqipërisë bazuar në raportin e Komisionit të BE dhe të merremi shumë me përgjegjësi me rekomandimet pozitive të Komisionit për hapjen e bisedimeve të pranimit me Shqipërinë. Ka një progres të prekshëm.
Pajtohem që ne duhet ta shohim procesin në këndvështrimin tonë dhe ta analizojmë atë më vonë. Por kjo duhet të ndodhë përmes një dialogu.
Unë dua të përgëzoj të gjithë njerëzit dhe autoritetet shqiptare për përpjekjet dhe arritjet e tyre të mëdha. Ata kanë ende një rrugë të gjatë për të shkuar dhe probleme serioze për t’u zgjidhur. Në këtë fazë Shqipëria meriton respektin dhe mbështetjen tonë të plotë”, shprehet deputeti i CDU-së. /tesheshi.com/
