Futbollisti me prejardhje shqiptare, ka qenë padyshim figura kryesore e duelit ndërmjet Evertonit dhe Stoke City-t, të cilën e fituan këta të fundit pas një drame të vërtetë, (3-4). Shaqiri realizoi dy golat e parë në këtë sfidë për skuadrën e tij, duke i ofruar dy herë epërsinë të besuarve të Mark Hughes.
Megjithatë, vendasit barazuan dy herë përmes Lukakut, për të kaluar në epërsi më pas me Deulofeun. Dhjetë minuta para fundit, Joselu barazoi rezultatin për miqtë, deri sa krejt në minutat shtesë, Arnautoviç realizoi nga penaltia, për t’i dhënë fitoren e madhe skuadrës Stoke City, që vazhdon ngritjen në klasifikim. Skuadra e Xherdan Shaqirit tashmë ndodhet në pozitën e tetë me 29 pikë të grumbulluara.
Fitore të vështirë, mirëpo tejet me rëndësi realizoi Tottenham Hotspur që në udhëtim mposhti skuadrën, Watford. Erik Lamela kaloi miqtë në epërsi, për të barazuar më pas Ighalo në fundin e pjesës së parë. Pjesa e dytë ishte histori në vete. Pas shumë kartonëve të verdhë dhe të kuq, Heung-Min Son, realizon ne minutën e fundit të kohës së rregullt, për t’i dhënë tre pikët e arta Spursave që tani renditen në pozitën e tretë tabelare, me tri pikë më pak se lideri Leicester City. /tesheshi.com/
