Një tjetër anije me refugjatë është mbytur në detin Mesdhe. Ngjarja ka ndodhur në jug të ishullit të Kretës, ku marina greke ka shpëtuar deri më tani 340 persona nga një anije e mbytur në gjysmë.
Organizata botërore për migrantët ka bërë me dije se 4 trupa të pajetë janë gjetur në det, ndërsa në bord ishin të paktën 700 refugjatë. Emergjenca vijon edhe në brigjet e Afrikës së Veriut, ku të paktën 117 trupa, mes së cilëve 70 femra dhe pesë fëmijë janë gjetur në brigjet e qytetit libanez Auwara, 120 kilometra nga Tripoli.
Anija në të cilën udhëtonin migrantët nisi të mbytej në ujërat ndërkombëtare, 75 milje në jug të portit të Kalo Limenit në Greqi. Alarmin për mbytjen e anijes e ka dhënë Roja Bregdetare italiane. Në vendngjarje kanë mbërritur katër anije shpëtuese, veç helikopterëve.
“Disa refugjatë përfunduan në ujë. Anijet e shpëtimit lëshuan varkat e tyre dhe po ndërhyjnë për të shpëtuar njerëzit”, – kanë thënë autoritetet portuale të shpëtimit. Sipas të dhënave të parë, anija me refugjatët mund të jetë nisur nga Libia, Egjipti apo Turqia. Destinacioni i tyre ishte Italia, por nuk përjashtohet edhe mundësia që skafistët të donin të mbërrinin në Greqi. /tesheshi.com/
