Hashim Thaçi, president i Kosovës i ardhur nga pushka si ish-komandant i UÇK-së, u nderua këtë të martë nga Akademia e Shkencave të Shqipërisë me mirënjohjen “Nderi i Akademisë”; edhe pse nuk e lidh asgjë me botën akademike, me motivacionin: “Figurë me rëndësi vendimtare në mbrojtje të njësisë së identitetit kombëtar, gjuhës dhe vlerave themelore shqiptare”.
Në ceremoninë e organizuar në Tiranë, Kryetari i Akademisë, Muzafer Korkuti që mbajti fjalën e rastit, bëri të mundur dhe zbërthimin e motivacionit për titullin që iu dha Thaçit: “Akademia jonë e Shkencave ka qenë e para që, përmes botimit në disa gjuhë të librit ‘Kosova, një vështrim enciklopedik’, bëri të njohura botërisht meritat tuaja si njeriu që qendroi në krye të procesit të pavarësimit të Kosovës, që është një ngjarje epokale; si kryenegociator i statusit të shtetit më të ri në Ballkan në Konferencën e Rambujesë dhe si ndërtues i paqes në një kohë shumë të vështirë.
Me këtë mirënjohje ne duam të vlerësojmë gjithashtu misionin tuaj në krye të shtetit të Kosovës, një mision që ju e keni kurorëzuar në kohë të mbara e në kohë të vështira”, tha Korkuti.
Më tej superlativat për Thaçin vijuan nga sfera e kontributeve si ish-luftëtar e politikan, në atë të kulturës.
“Në krye të këtyre misioneve, si kryetar i qeverisë e si kryetar i shtetit, Ju keni qenë po aq i ndjeshëm sa dhe bota akademike e universitare në Kosovë e në Shqipëri për ruajtjen dhe përurimin e trashëgimit shpirtëror të popullit shqiptar, për theksimin e njëjtësisë së historisë, të traditave, të identitetit dhe të gjuhës sonë letrare kombëtare”, theksoi akademik Korkuti. /tesheshi.com/
