Një ndërtim pa leje ka çuar në shkarkimin e pothuajse të gjithë drejtuesve të komisariatit nr 2 në Tiranë. Urdhëri është dhënë nga Drejtori i Përgjithshëm i Policisë së Shtetit, Haki Çako. Pak ditë më parë kreu i policisë deklaroi se paligjshmëria do të goditet njëlloj si droga, çka duket se e ka pasur seriozisht kur brenda pak ditësh në kryeqytet u shkarkuan dy shefa komisariatesh.
Sipas një njoftimi zyrtar, policia ka përfunduar me sukses operacionin “Ndërtimi3”, duke arrestuar efektivin e krimeve, Roland Skënderi, 40 vjeç.
Ky i fundit po ndërtonte një bar kafe pa leje. Në pranga ka rënë gjithashtu edhe një inspektor i lartë i Bashkisë së Tiranës për shkak të shpërdorimit të detyrës.
Gjithashtu me urdhër të kreut të policisë janë shkarkuar drejtuesit e komisariatit si dhe disa zyrtarë të tjerë të lartë.
Njoftimi i policisë
Në zbatim të detyrave të dhëna nga Drejtori i Përgjithshëm i Policisë së Shtetit për marrjen e menjëhershme te masave ndaj ndërtimeve pa leje dhe krimeve mjedisore, më datë 23.08.2017, në orën 23:30, nga Sektori për Krimin Ekonomiko Financiar në D.V.P.Tiranë në bashkëpunim me Shërbimin e Çështjeve të Brendshme dhe Ankesave (SH.Ç.B.A), dhe Drejtorinë e Standarteve Profesionale në Policinë e Shtetit, si dhe me Prokurorin e Rrethit Gjyqësor Tiranë, në kuadër të operacionit “NDËRTIMI-3”, u bë arrestimi në flagrancë i shtetasve:
Roland Skënderi, 40 vjeç, banues në Tiranë , me detyrë oficer policie për Krimet, në Komisariati i Policisë nr.2-Tiranë.
Shyqyri Gega, 50 vjeç, banues në Tiranë, me profesion Inxhinier Gjeolog, i punësuar si Inspektor i lartë tek IMT Bashkia Tiranë.
Proçedimi i këtyre shtetasve u bë për veprën penale “ndërtim pa leje” dhe “shpërdorim detyre”, pasi më datë 23.08.2017, në rrugën Muhamet Gjollesha, pallati ML, shtetasi Roland Skënderi ka kryer ndërtim pa lejen e organeve kopetente, konkretisht një lokal bar kafe.
Sa më sipër nga ana e Inspektorit të Inspektoriatit Mbrojtjes së Territorit, edhe pse morrën dijeni për këtë ndërtim pa leje, nuk kanë nxjerr vendim për prishjen e tij, por e kanë lejuar duke u mjaftuar me pezullim të punimeve dhe pa njoftuar Policinë e Shtetit për ndërtimin, i cili kanë sjellë pasoja ndaj interesave të ligjshme të shtetasve (banorëve të pallatit), në kundërshtim me ligjet në fuqi.
Materialet proçeduriale iu kaluan Prokurorisë pranë Gjykatës së Shkallës së Parë Tiranë, në ngarkim të shtetasve të sipërpërmendur, për veprën penale “ndërtim pa leje dhe shpërdorim detyre, prashikuar nga nenet 199/a dhe 248 e 25 Kodit Penal.
Gjithashtu nga Drejtoria Vendore e Policisë Tiranë dhe nga Drejtoria e Standarteve Profesionale në Drejtorinë e Përgjithshme të Policisë së Shtetit janë marrë masa administrative për oficerët e policisë si më poshtë:
Shkarkim nga detyra për shefin e Komisariatit të Policisë nr.2 Tiranë.
Shkarkim nga detyra dhe nisjen e hetimit disiplinor për shefin e policimit në komunitet, pranë komisariatit nr.2.
Shkarkimin nga detyra dhe fillimin e hetimit disiplinor për specialistin e policisë kriminale (që mbulon zonën), pranë komisariatit nr.2.
Shkarkimin nga detyra dhe fillimin e hetimit disiplinor për specialistin e policisë së rendit (që mbulon zonën), pranë komisariatit nr.2.
Po në lidhje me këtë ndërtim pa leje nga SH.Ç.B.A janë kryer veprime proçeduriale penale mbi dyshimet për implikim të punonjësve të policisë pranë Komisariatit nr.2, të cilët kanë marrë dijeni dhe nuk kanë kryer detyrat funksionale sipas proçedurave standarte për ndërtimet pa leje. /tesheshi.com/
