Nga Ylli Pata
Në Tiranë ka nisur një aksion i ri, që edhe pse pa zhurmë, konsiderohet në të njëjtin intensitet si ai për energjinë dhe informalitetit.
Me emërimin e drejtorit të ri të ujësjellësitm Eqerem Braçe, i ardhur nga Fieri, faturuesit kanë “liruar” dorën ndërkohë që grupe të shumta po shkojnë sahat më sahat duke dorëzuar fletën e gjobës.
Në zyrën e UKT-së tek bulevardi “Gjergj Fishta”, një grup i madh grash janë mbledhur dhe flasin me vete, pasi një roje i nxjerr nga salla e shërbimit të klientit.
“Na kanë faturu 40 mijë lekë ujë, po ne na vjen vetëm një herë dhe ne s’kemi as depozitë, jemi në kat të parë dhe s’para harxhojmë. Jemi gjithë ditën duke mbledhur kanoçe”, thotë Beta, një grua rome, e cila thotë se ja kanë prerë dritat.
Besniku, një 45-vjeçar thotë se ka një dyqan të vogël te Selita e Vogël, por i kanë ardhur fatura të kripura dy muajt e fundit. “Vetë faturistja më ka thënë se i kanë porositur që të rrisin më dyfish tarifat. As shohin sahat as gjë. E ke lëvizur më thonë, por unë skam pse e lëviz”, thekson Besniku.
Një djalosh me fytyrë të parruar i bërtet Besnikut: “ça ke që flet, të kam ardhur dy herë me grupin e punës dhe të kam gjetur me shkelje. Të kam lënë dokumentin”. Aty plas një sherr i vërtetë. Ndërhyjnë nja dy vetë, por të dy palët janë në stress.
Dikush bërtet: “po se e ka vu Koço drejtorin”.
Futet politika edhe këtu. Futet që çke me të.
Ujësjellës Kanalizime janë ndërmarrja më e fuqishme e kryeqytetit, ka varësi dyfishe si nga Bashkia e Tiranës ashtu edhe nga Ministria e Transporteve. Domethënë, nga PS dhe LSI-ja. Një mpleksje interesash pasi ka një numër të madh punonjësish, rreth 1 mijë.
Që tani ka filluar gara për t’u punësuar. Në drejtorinë qendrore sheh radhë njerëzish me letra në duar që presin të zënë vend. “Presim për testim”, thotë Gazi, një 20-vjeçar nga rrethinat e Tiranës që thotë se ka mbaruar shkollën e rezervave për hidraulik, ndërkohë që pohon se ka qenë aktiv në fushatën e zgjedhjeve lokale në Vorë. Natyrisht për LSI-në.
Por nga porta qendrore dalin grupe njerëzish që hipin me vrull nëpër fuoristrada, për të shkuar në bazë e për të vënë gjoba. Është koha e një aksioni të ri…/tesheshi.com/
