Tirana zyrtarë ka bërë një përpjekje për të sqaruar Athinën për rastin e Fredi Bejlerit, duke thënë se nuk ka kurrfarë diskriminimi etnik në moskandidimin e tij për kreun e Bashkisë Himarë. Duke qenë se Beleri po hetohet për rastin e masakrës së Peshkëpisë, Ministria e Jashtme, në një deklaratë thotë se “Situata lidhur me shtetasin shqiptar Fredi Bejleri është e qartë.
Komisioni Qendror i Zgjedhjeve, me votë unanime dhe bazuar në legjislacionin në fuqi, ka ndaluar kandidimin e tij në zgjedhjet e ardhshme vendore në Shqipëri, referuar faktit se legjislacioni elektoral shqiptar ndalon, për një periudhë 10-vjeçare, kandidimin e personave për t’u zgjedhur në postin e kryetarit të njësisë së qeverisjes vendore, të cilët kanë qenë dënuar me vendim të formës së prerë nga gjykatat shqiptare”.
Për qeverinë shqiptare, çdo shtetas minoritar gëzon të drejtat bazë pa u cenuar as në kandidim, as në vetëdeklarim etnik e as në pronësi
“Në Shqipëri garantohet e drejta e personave që u përkasin pakicave për t’u vetë-identifikuar si të tillë dhe e drejta e tyre e pronësisë pa diskriminim. Po kështu, është i garantuar ushtrimi i gjitha të drejtave elektorale të shtetasve që u përkasin pakicave. Mbi këtë bazë, çdo qytetar shqiptar, minoritar ose jo, ka të drejtën t’i drejtohet gjykatave shqiptare si organet kompetente për interpretimin e Ligjit në Republikën e Shqipërisë”, thuhet në deklaratë.
Tirana i kujton Athinës se “Partneriteti strategjik dhe miqësia mes dy vendeve tona, si dhe dialogu i pandërprerë për tejkalimin e çështjeve dypalëshe, përfshi fuqizimin e të drejtave të pakicës greke në Shqipëri dhe komunitetit shqiptar në Greqi kanë qenë dhe mbeten përparësi e qeverisë shqiptare.
Shqipëria beson fuqimisht se vetëm zgjidhjet e bazuara në shtetin e së drejtës dhe kulturën politike evropiane janë me interes vital për të dy vendet”. /tesheshi.com/
