Në ditën e dytë të “Vëllazërisë Sllave 2016”, stërvitjes së përbashkët ruso-serbe dhe bjelloruse në mes të Ballkanit, mbërrin në Tiranë shefi i diplomacisë së Ukrainës, për të sfiduar politikën e Vladimir Putinit në këtë rajon.
NATO pritet t’i përgjigjet ashpër politikisht Rusisë, e cila prej ditës së djeshme ka sjellë ushtrinë në Ballkan në një stërvitje më shumë politike sesa ngushtësisht balistike.
Siç njofton ministria e Jashtme shqiptare, sot mbërrin për vizitë ministri i Jashtëm i Ukrainës, Pavlo Klimkin, i cili do të ketë edhe një konferencë shtypi me homologun e tij shqiptar, Ditmir Bushati.
Zyrtari i lartë i Kievit do të pritet edhe nga kryeministri Edi Rama dhe presidenti i Republikës, Bujar Nishani.
Kjo është vizita e parë e një zyrtari të lartë të Ukrainës në Tiranë pas shpërthimit të konfliktin me Moskën.
Sanksionet ndaj Rusisë pritet të jenë objekt i bisedimeve, dhe pritet gjithashtu që Kievi të shprehet i gatshëm që eksportet bujqësore nga Shqipëria që deri dje i ka marrë Rusia, por që sot ndalohen nga embargo, të kalojnë në Ukrainë.
E ndërkohë, mesazhi më i rëndësishëm pritet të jepet pikërisht në lidhje me Rusinë, e cila kohët e fundit po ndërhyn fuqishëm në Ballkan, deri në kufirin e brendshëm të NATO-s.
Tre avionë ushtarakë rusë transporti “Iliushin”, me 212 parashutistë u ulën në aeroportin e Batajnicës për të marrë pjesë në stërvitjet ushtarake “Vëllazëria sllave, 2016”.
Përveç njerëzve, Rusia ka sjellë në Serbi dhe tre automjete të blinduara “B.E.D. 2”, një avion zbulues pa pilot “Tachyon”, si dhe pajisje të tjera.
Së bashku me ushtrinë ruse, për të marrë pjesë në ushtrime kanë ardhur edhe 56 ushtarë të Bjellorusisë.
Gjatë manovrave do të demonstrohen ekzekutimet e hedhjeve me parashutë dhe sulmet me helikopterë, operacionet luftarake me mjete të blinduara, si dhe shumë veprimë të tjera në situata të tilla.
Në Serbi, arriti edhe trupa artistike e Forcave Aerohapësinore të Federatës Ruse. Së bashku me Ansamblin Artistik të Ministrisë së Mbrojtjes “Stanislav Biniçki”, të dy ansamblet do të mbajnë koncerte të përbashkëta në Nish, për pjesëtarët e Ushtrisë së Serbisë me 6 nëntor 2016 dhe në Pançevo, më 13 nëntor 2016.
Stërvitja ushtarake “Vëllazëria sllave” u mbajt për herë të parë vitin e kaluar në afërsi të Novorosijsk. /tesheshi.com/
