Në reagimin e parë pas shpalljes në Bruksel të metodologjisë së re të pranimit, Tirana zyrtare reagoi me anë të minsitrit të Jashtëm në detyrë Gent Cakaj. Sipas këtij të fundit, qeveria është gati t’i përgjigjet edhe kësaj sfide të re.
“Ne mirëpresim metodologjinë e re të përpiluar nga Bashkimi Evropian për vazhdimin e procesit të zgjerimit në Ballkanin Perëndimor. Shqipëria është e gatshme të vazhdojë reformat përmbajtësore e transformimin rrënjësor në përputhje me parimet e metodologjisë së re dhe pret çeljen e bisedimeve për anëtarësim brenda 2020”, shkruan Cakaj.
Në një përpjekje për të vlerësuar atë që në fakt u bë pengesë për çeljen e negociatave, Cakaj tha se “Platforma e re e Komisionit Evropian është po ashtu një investim afatgjatë gjeostrategjik në stabilitetin, zhvillimin e demokratizimin e Ballkanit Perëndimor në tërësi”.
Kujtojmë se metedologjia e re për anëtarësim në BE, u kërkua me ngulm nga Franca, e cila, mu për këtë arsye, nuk pranoi hapjen e negociatave me Shqipërinë dhe Maqedoninë e Veriut. /tesheshi.com/
