Krerët e shtetit dhe politikës shqitare, kanë përshëndetur themelimin e ushtrisë së Kosovës, akti i dytë më i madh pas Pavarësisë.
Presidenti Meta tha se “Vendimi historik i krijimit të Forcave të Armatosura të Republikës së Kosovës dëshmon qartë që Kosova është e aftë të marrë përgjegjësi të reja në ndërtimin e institucioneve demokratike dhe për të kontribuar vendosmërisht për paqen, stabilitetin e rajonit dhe fqinjësinë e mirë. Fryma euro-atlantike qëndron në themel të këtij ndryshimi historik”.
Kryeministri Rama ka bërë diferencën në stilin e përcjelljes së urimit duke e patur atë më tepër vizual se sa tekstual. Shefi i qeverisë zgjodhi një foto të presidentit Thaçi veshur ushtarakisht, shoëruar vetëm me fjalën “Urime” përsëritur tre herë. (Foto kryesore)
Ndërsa fjalët e zgjedhura nga kryetari i PD-së Basha kanë qenë këto:
“Urime Kosovë për Ushtrinë!
Pas Pavarësisë, ngjarja e dytë e përmasave kombëtare dhe historike. Me Ushtrinë e saj Kosova do të jetë më e sigurtë, rajoni më në paqe, kombi shqiptar i integruar dhe më i fortë.
Nderim të rënëve për liri, mirënjohje miqve të mëdhenj që na mbështetën! /tesheshi.com/
