Në ditën Ndërkombëtare të Vallëzimit, Bashkia Tiranë ka organizuar Maratonën e Vallëzimit, e cila ka nisur në orët e para të ditës për të përfunduar në mbrëmje.
Ky aktivitet u ndoq nga nënkryetari i Bashkisë së Tiranës, Abaz Hado, i cili theksoi se Bashkia ka mundësuar edhe Tirana të festojë dhe të vallëzojë ashtu si shumë kryeqytete të tjera të Europës që iu janë bashkuar aktiviteteve me rastin e Ditës ndërkombëtare të Vallëzimit.
“1600 fëmijë prej disa orësh kanë ardhur të kërcejnë dhe do të vijojnë deri në orët e vona të mbrëmjes. Ky aktivitet është për të treguar që Tirana duhet jetë një qytet që gëzon, ku kërcehet, ku festohet. Gjithashtu përmes këtij organizimi mendojmë që ta kthejmë Tiranën në një qytet atraktiv, në qytet, i cili meriton që qytetarët e saj, fëmijët e saj, të gëzojnë, të tregojnë talentin e tyre”, u shpreh Hado.
Më tej, ai theksoi se Bashkia e Tiranës është e vendosur që t’i japë qytetit më shumë mundësi për të festuar dhe argëtuar jo vetëm në ditët e shënuara, por edhe me organizimin e aktiviteteve që synojnë të nxisin një jetë më aktive.
“Ne do ta kthejmë Tiranën shumë shpejt, siç kemi filluar, jo vetëm në një qytet të bukur, por edhe në një qytet ku qytetarët e saj, fëmijët e saj, rinia e saj të gëzohet dhe i feston ditët si gjithë Europa, si gjithë kryeqytetet europiane”, deklaroi Hado.
Maratona e Vallëzimit është parashikuar të zgjas afro 15 orë. /tesheshi.com/
