Nuk ka shkuar krejt “fjollë” një konferencë për shtyp mes ministres së Jashtme Olta Xhaçka dhe homologut të saj grek Dendias, kjo pasi kryediplomatja shqiptare ka prekur sërish një çështje të cilën Athina s’e duron, atë Çame.
“Vullneti i mirë për të gjetur një zgjidhje të pranuar reciprokisht në një çështje kaq të vështirë si ajo e
hapësirave detare, mund të shërbejë edhe si një shembull i qasjes konstruktive me të cilën vendet tona mike mund të nisin diskutimet edhe për çështje të tjera të vështira, që kemi trashëguar nga Lufta e Dytë Botërore, siç janë abrogimi i ligjit të luftës dhe çështjet e të drejtave të komunitetit çam”, tha Xhaçka, gjë që ka sjellë një lloj kërcënimi nga ana e Dendiasit.
“Duhet të mos krijojmë çështje që nuk janë ekzistuese sepse kjo gjë do të na çojë në pasoja të shumëfishta, ku Greqia pastaj do të vendosë çështje të tjera që mund të ndikojnë në itinerarin tuaj në Europë.
Duam të zgjidhim diferencat tona sa i përket kufirit detar.. Ligji i luftës është diçka që duhet të shkëputemi dhe do të bashkëpunojmë. Dua të jem i sinqertë, ne duhet të diskutojmë për çështje praktike që kanë të bëjnë me palën greke dhe ato do i diskutojmë. Do të diskutojmë çështjen e minoritetit grek dhe komunitetit shqiptar në Greqi”, shtoi Dendias, pra duke mos e përmendur fare çështjen çame. /tesheshi.com/
