Fiks pas tre muajsh bllokim jo vetëm të jetës institucionale, por edhe politike, si dhe të një jete normale për qytetarët e Tiranës, është mbyllur çadra e PD-së në bulevardin kryesor, duke u çmontuar përfundimisht.
Rreth orës 21:30 të së enjtes, Lulzim Basha nisi fjalën e mbylljes së çadrës së protestës. Para mbështetësve të tij dhe në ditën e 90-të të ngritjes së çadrës, Basha deklaroi se objektivi u arrit.
“Arritëm marrëveshjen politike për ndryshimet kushtetuese, të sistemit zgjedhor dhe të gjithë parametrave që do të dorëzojnë pushtetin e uzurpuar nga kupola e vjetër politike tek qytetarët shqiptarë.”
Pas shpalljes së mbylljes së çadrës, militantët e ngujuar aty u dyndën në selinë e Partisë Demokratike, ku Basha i priti dhe u tha të rrinin si në shtëpinë e tyre.
Ndërkaq, një kamion u vendos pranë çadrës dhe më pas çmontoi të gjithë konstruksionin.
Sot Tirana është zgjuar me bulevardin e lire, e me një shesh politik më të qetë dhe me më pak tensione. /tesheshi.com/
