Tirana me disa qendra, projekti ambicioz i arkitektëve të Harvardit

Kryebashkiaku i Tiranës, Erjon Veliaj, ka thirrur në ndihmë një një ekip arkitektësh nga Universiteti i Harvard-it për të realizuar projektin e një kryeqyteti me disa qendra.
Ekipi i universitetit më të njohur në botël në bashkëpunim me studentë vendas, prezantuan sot 3 projekte konkrete që do të marrin jetë në kryeqytet.
Parku Qendror i Bulevardit të Ri, rikonceptimi i Kombinatit si poliqendra e parë e Tiranës dhe Fasadat e qytetit, janë tre projektet të cilat u diskutuan sot në një konsultim publik me ekspertë dhe grupe interesi.
Projekti i parë është projekti për Parkun Qendror te Bulevardi i Ri, një hapësirë e gjelbër, 6 herë më e madhe se Parku Rinia, i cili do të jetë mushkëria e re e kryeqytetit.
“Projekti “William”, është projekti i parkut qendror te Bulevardi i Ri që bën fjalë për një hapësirë, e cila është vendosur në të majtë të Bulevardit të Ri, duke filluar në 500 metrat e parë dhe mbaron deri tek 1.5 km. Është një hapësirë rreth 6 herë më e madhe se Parku Rinia dhe që do të krijojë Parkun e ri Qendror të qytetit”, tha Veliaj, duke shtuar se pas sheshit “Skënderbej” dhe pas Parkut të Liqenit të Tiranës, atij të Farkës dhe të Kasharit, Parku Qendror do të jetë një nga pjesët më kreative të qytetit.
Projekti i dytë është ai që ka të bëjë me idenë e poliqendrave të Tiranës dhe më konkretisht për rikonceptimin e zonës së Kombinatit. Plani i Stefano Boerit parashikon një Tiranë me disa qendra.
“Kemi propozuar që Kombinati të jetë një qëndër më vete, po ashtu edhe Lapraka, “Qyteti Studenti” te rruga e Elbasanit dhe Kinostudio. Në pamundësi për t’i filluar të gjitha njëherësh, kemi zgjedhur Kombinatin, duke filluar nga sheshi “Garibaldi” e deri te pjesët industriale që mund të akomodojnë edhe industrinë kreative. Fakti që kemi koncentruar aty disa shërbime, çerdhe të reja, kopshte të reja, shkollën e re “Betim Muço” që po mbaron, fakti që mbikalimi te Kombinati Ushqimor gjithashtu lehtëson trafikun, krijon një infrastrukturë të mjaftueshme për ta trajtuar Kombinatin si një prej poliqendrave të Tiranës, për t’u siguruar që jo çdo njeri duhet të vijë te sheshi “Skënderbej” për të marrë shërbime”, tha Veliaj.
Projekti i tretë lidhet me transformimin e projektit të fasadave të Tiranës nga një projekt ad-hoc, në një projekt afatgjatë./tesheshi.com/