Negociatat mes Tiranës dhe Athinës nuk kanë ecur asnjë milimetër përpara, ndërkohë që Ministri i jashtëm Ditmir Bushati, ka kërkuar më shkoqur hapjen e çështjes çame dhe heqjen e ligjit të luftës mes Shqipërisë dhe Greqisë.
Ministri i Jashtëm i Greqisë, Nikolaos Kotzias, i cili ka nisur sot një vizitë dyditore, deklaroi se Athina nuk njeh as çështjen çame dhe që nuk ka ndërmend ta heqë ligjin e luftës me Shqipërinë.
Ministri i Jashtëm grek ofroi një pikëpamje të çuditshme në lidhje me çështjen çame duke e lidhur me identitetin fetar. “Ka çamë që janë në Shqipëri, ka çamë islamë që janë bërë ortodoksë që jetojnë në Greqi, ka edhe çamë që kanë bashkëpunuar me pushtuesin”, tha Kotzias.
Ndërkaq, për ligjin e luftës, Kotzias tha se “Greqia beson se me deklaratën e 1987 ne nuk jemi në luftë. Kjo është e vërtetë. Marrëveshja e miqësisë në 1996 është e vërtetë. Integrimi i Shqipërisë në NATO dhe prespektiva e hyrjes në BE na bën jo vetëm miq, por dhe partnerë. Nëse ekzistojnë dyshime nëse jemi ose jo në gjendje lufte do të jetë objekt diskutimi që do të zhvillohet dhe do ta gjejmë.”
Ministri i Jashtëm Shqiptar, Ditmir Bushati, deklaroi se “Çështja çame është pjesë e kapitullit që e ka origjinën në Luftën e Dytë Botërore. Jemi vende fqinje dhe është normale të kemi lexime të ndryshme, besojmë se një trajtim realist do të zbuste tonet nacionalsite dhe të vendoste drejtësinë e munguar. Nuk bëhet fjalë për pretendime territoriale. Shqipëria nuk ka asnjë lloj pretendimi territorial”.
Bushati shtoi se “kemi rreth 1 vit që po punojmë për të adresuar disa prej çështjeve që nuk kanë gjetur ende trajtim si përsa i përket çështjeve që e kanë origjinën tek Lufta e dytë Botërore, çështje që kanë interes praktik për qytetarët, por edhe ato çështje që janë përcaktuese për integrimin në BE”./tesheshi.com/
