Pa ardhur ende pjesa më e madhe e muxhahidinëve në Shqipëri, të cilët u pranuan pas një marrëveshje me SHBA-në, ka ndodhur një problem në mesin e tyre duke rrezikuar një incident diplomatik.
Tirana zyrtare ka kthyer në Teheran një person i cili kërkohej nga Irani për t’u dënuar me akuzën e kryerjes së akteve terroriste.
Iraniani është arrestuar në Shqipëri ku është regjistruar në grupin e muxhahidinëve të sjellë nga Iraku.
Siç bën të ditur radio Irani në gjuhën shqipe, një anëtar i organizatës MEK është arrestuar dhe dërguar në Teheran, pas një kërkese të policisë iraniane dërguar Interpolit.
Zëdhënësi i policisë iraniane tha se ai është përgjegjës për shpërthimin e bombës në selinë e partisë “Republika Islamike e Iranit”.
I arrestuari, identiteti i të cilit mbahet sekret akuzohet edhe për trafik droge dhe arratisje nga burgu në Iran.
Policia iraniane në bashkëpunim me Interpolin ka identifikuar një prej trafikantëve të drogës që ishte larguar nga burgu dhe që ndodhej në Irak, dhe më pas ai është arrestuar nga policia irakiane. /tesheshi.com/
