Tirana e kalon me 17 deri 23% normën e lejuar të ndotjes së ajrit . Kjo vihet re sidomos në zonën e Bllokut në kryqëzimin te Rruga e Elbasanit dhe 21 Dhjetori.
Këto janë të dhënat zyrtare të Agjencisë Kombëtare të Mjedisit.
Po ashtu kryeqyteti i Shqipërisë përveç ndotjes së ajrit ka dhe ndotje akustike të lartë jo vetëm ditën, por dhe natën, për shkak të lokaleve të shumta me muzikë.
Drejtori i Përgjithshëm i Agjencisë Kombëtare të Mjedisit, Julian Beqiri , tha sot se edhe Fieri, Lushnja Lezha gjithashtu rezultojnë në raport më të ndotura, ndërsa Korça paraqet shqetësim gjatë periudhës së dimrit për shkak të ngrohjes me dru.
“Transporti është e keqja më e madhe. Menaxhimi më i mirë i situatës do të sjellë një përmirësim të cilësisë së ajrit”- tha ai.
Beqiri, në një konferencë për shtyp vuri theksin tek problemet me plazhet, ku mungojnë koshat e plehrave dhe nuk menaxhohen si duhet nga bashkitë.
“Kemi përmirësim në menaxhimin e ujërave të zeza dhe mbetjeve urbane, por nuk mund të them të njëjtën gjë për pjesën e rërës në të gjithë vijën bregdetare. Nuk ka kosha mbeturinash. Nuk ka informim nga bashkitë për të promovuar zonën e tyre”-tha Beqiri. /tesheshi.com/
