Nga Blendi Gashi
Kryekuvendari Kadri Veseli, në një seancë të veçantë parlamentare para grave deputete si dhe asambleisteve të komunave, të mërkurën foli për fuqizimin e rolit të gruas në jetën politike në shoqëri si dhe për diskriminimin e tyre në shumë fusha shoqërore.
Ai tha se gratë duhet të jenë të vendosura dhe mos të heqin dorë nga të drejtat dhe përgjegjësitë që duhet ti kenë, derisa shtoi se “barazia gjinore është interes nacional dhe strategjik i shoqërisë sonë që aspiron zhvillimin dhe ecjen përpara në proceset evro-atlantike”.
Veseli më tej tha se “barazia gjinore nuk është çështje e retorikës ditore politike e as standard formal apo dekorativ për të përmirësuar imazhin e këtij apo atij subjekti”.
Këto deklarime të bëra në mesin e grave e kanë “nervozuar” jo pak zyrtaren për media në Vetëvendosje Tinka Kurti, e cila ka reaguar fuqishëm duke thënë se Veseli por edhe presidenti Thaçi nuk kanë asgjë të përbashkët me barazinë.
Vetëvendosësja Kurti e quan sharlatan Veselin derisa ia kujton fyerjen që ia bëri në një nga seancat deputetës Albulena Haxhiu, pra fjalorin banal që përdori ndaj saj.
“Kadri Veseli për disa (shumë) tema është më mirë mos me e çel gojën. Këtu bën pjesë edhe barazia. Sot paska thënë që “Barazia – gjinore – është – interes – nacional – dhe – strategjik – i – shoqërisë – sonë – që – aspiron – zhvillimin – dhe – ecjen – përpara – në – proceset – evro-atlantike”. Bravo. Kjo fjali ka vlerë në konkursin e tipit – si të formulohet një fjali e gjatë pa thënë asgjë. Sharlatani që argument kryesor kur flet me gratë e ka dëshiroren ‘ma hongsh’, duhet ta ketë parasysh se barazia pikë së pari është e drejtë e gjithsecilit, përpara se të jetë interes i kujtdo”, ka reaguar Kurti përmes një shkrimi në Facebook.
Ajo thotë se tema për barazinë gjinore nuk mund të trajtohet me terma leverdie dhe se boll u trajtuan gratë nëpërmjet frazeologjisë së vjetruar e demagogjike.
“Fjalët pa asnjë kuptim konkret, nuk mund të dëgjohen aty ku shtypja është konkrete dhe e dukshme. Këto përralla me mbretër nuk i blejnë gratë e Kosovës. Sikurse nuk i blenë as dokrrat qesharake të Hashimit në shkrimin e tij për këtë 8 mars, që ai si president po punoka në dy projekte lidhur me barazinë gjinore: reforma elektorale dhe formimi i Komisionit për pajtim me Serbinë. Marri. Të dyja këto sikur çdo gjë tjetër po i bën për vete. Ajo reformë i duhet Hashimit, për t’i dhënë kompetenca vetës duke e bërë Kosovën një vend presidencial. Së dyti, Komisioni për Pajtim me Serbinë, nuk e kanë kërkuar personat e dhunuar seksualisht gjatë luftës. Ato/ata nuk kanë çka t’i falin Serbisë sepse shteti serb nuk u ka kërkuar falje. Viktimat e kësaj dhune presin kërkim falje nga Serbia, por faljen nuk mund ta bëjë askush në emër të tyre”, thotë Kurti.
Zyrtarja për media e VV-së thotë se Thaçi e Veseli nuk kanë asnjë lidhje me barazinë, por shtron pyetjen se; këshilltarët e tyre çfarë deserti po shijonin derisa këta i hartojnë këto fjalime me nivel logjik imbecil? /tesheshi.com/
