Edhe sekretari amerikan i shtetit, Rex Tillerson ka vazhduar traditën e pararendësve të tij, që herë pas here kryenin vizita të paparalajmëruara në Afganistan. Burime pranë ekipit të tij i thanë medias ndërkombëtare se ai do të bisedojë me liderët afganë çështje të ditës që janë emergjente pas një lufte 16-vjeçare.
Në takimin me dyer të mbyllura mbajtur në aeroportin Bagram, që është baza më e madhe amerikane në Afganistan, Tillerson bisedoi me presidentin afgan, Ashraf Ghani, për luftën kundër kryengritësve, pas tërheqjes së pjesës më të madhe të forcave të NATO-s në vitin 2014.
“Qartazi ne duhet ta vazhdojmë luftën kundër talibanëve dhe kundër të tjerëve, me qëllim që ata ta kuptojnë se kurrë nuk do të arrijnë fitore ushtarake”, u tha Tillerson gazetarëve pas takimit.
“Është e domosdoshme që në fund, ne të mos u lejojmë organizatave terroriste apo atyre ekstremiste, që të kenë strehim të sigurt në ndonjë pjesë të kësaj bote”, tha sekretari amerikan i Shtetit. /tesheshi.com/
