Përfaqësuesjja e opozitës bjelloruse, Svetlana Tikhanovskaya tha se në vendin e saj po zhvillohej një “grusht shteti paqësor”, megjithë shtypjen me të cilën autoritetet donin të shuanin demonstratat kundër presidentit Aleksandër Lukashenko.
Protestat e papara kundër qeverisë së Lukashenkos, e cila ka qeverisur Bjellorusinë autoritarisht që nga viti 1994, po hyjnë në javën e tyre të tretë, raporton AFP.
Edhe pse numri i demonstruesve nuk po zvogëlohet, presidenti është rreshtuar me deklarata kërcënuese dhe paraqitje publike në veshje ushtarake, gjë që shoqërohet me shtypje të intensifikuar.
“Tani jemi në shumicë. Një revolucion paqësor po zhvillohet. Ky nuk është një grusht shteti gjeopolitik […], ky është një grusht shteti demokratik,” tha Tikhanovskaya, e cila, e strehuar në Lituani, mbajti një fjalim para anëtarëve të Parlamentit Evropian.
“Vendi im është në krizë,” tha ajo, duke kujtuar arrestimet, zhdukjet dhe vdekjet e protestuesve “në mes të Evropës”.
Opozita, e gatshme për të negociuar me autoritetet
Të martën, me ftesën e saj, rreth 3,000 njerëz u mblodhën në qendër të Minskuut, ndërsa rreth 1.000 mbështetës të Lukashenkos u mblodhën diku tjetër në kryeqytet.
Demonstratat u nxitën nga njoftimi i rezultateve të zgjedhjeve presidenciale të 9 gushtit, në të cilat Lukashenko fitoi 80 përqind të votave, por të cilat opozita i konsideron të rreme.
Duke kërkuar “zgjedhje të lira dhe të ndershme”, Tikhanovskaya tha se ajo ishte e gatshme të “negociojë me autoritetet” dhe “të ekzaminojë mundësinë e ndërmjetësimit nga organizatat ndërkombëtare”, duke respektuar “sovranitetin e Bjellorusisë”.
Gjykata Supreme të martën kundërshtoi kërkesën e saj për anulimin e rezultateve të zgjedhjeve presidenciale.
Bashkimi Evropian nuk i njeh rezultatet e zgjedhjeve dhe shpall sanksione shtesë për zyrtarët bjellorusë. /tesheshi.com/
