Kina dërgoi një tjetër anije kozmike në hapësirë të shtunën duke transportuar furnizime për stacionin e saj të ri hapësinor.
Raketa “7 Marsi i gjatë”, që mbante automjetin e ngarkesave “Tianzhou 5”, u lëshua nga Qendra Hapësinore Wenchang në ishullin jugor kinez të Hainan dhe u ankorua me sukses në Stacionin Hapësinor Tiangong të përfunduar së fundmi, njoftoi programi hapësinor kinez.
Anija kozmike u ankorua me stacionin në kohë rekord, sipas Agjencisë Hapësinore të Kinës, e cila shtoi se udhëtimi zgjati vetëm dy orë.
“Tianzhou 5” u ankorua me stacionin tre herë më shpejt se “Tiahzhou 4”, të cilit iu deshën gati shtatë orë për t’u ankoruar pas nisjes.
Ky fluturim mallrash është pjesë e përgatitjeve për një hap historik në programin hapësinor të Kinës, ndryshimi i parë i ekuipazhit në hapësirë.
Ambicia e Kinës për t’u bërë një fuqi hapësinore
Tre astronautët – të njohur si taikonautët në Kinë – pritet të mbërrijnë në stacionin hapësinor të përfunduar së fundmi deri në fund të muajit, ku do të bashkohen me kolegët Chen Dong, Liu Yang dhe Cai Xuzhe.
Ekuipazhi aktual është planifikuar të kthehet në Tokë në dhjetor.
“Tianzhou 5” është misioni i dhjetë për ndërtimin dhe furnizimin e stacionit hapësinor.
Stacioni hapësinor Tiangong është një vazhdim i ambicieve të Kinës për t’u bërë një fuqi hapësinore dhe për të arritur hapin me vendet e mëdha hapësinore, SHBA-në dhe Rusinë.
Stacioni kombëtar hapësinor i Kinës ndodhet në një lartësi prej 400 kilometrash dhe do të jetë në funksion për më shumë se një dekadë.
Stacioni pritet të jetë funksional deri në fund të këtij viti, shtuan autoritetet kineze dhe do të jetë i disponueshëm për projekte ndërkombëtare. /tesheshi.com/
