Lëvizja kryesore antimonarkike e Britanisë ka planifikuar demonstrata për ditën e kurorëzimit të mbretit Charles III javën e ardhshme.
Anëtarët e organizatës pro-demokratike Republic, e themeluar në 1983, po planifikojnë demonstratën e tyre më të madhe deri më tani.
Kreu i organizatës, Graham Smith, e konsideron kurorëzimin e mbretit të Britanisë si rastin më të mirë për të nënvizuar se sa anakronik është institucioni i monarkisë, i cili, siç e konsideron ai, nuk ka vend në një demokraci të shekullit të 21-të, kryesisht në një kohë kur qytetarët po përballen me krizën më të rëndë të kostos së jetesës në dekada.
Smith thotë se pret më shumë se 1000 protestues me këmishë verdha në demonstratën e 6 majit. Kur Charles të kalojë me karrocën e tij të artë, ata synojnë të bërtasin me zë të lartë: “ti nuk je mbreti im”.
Sondazhet tregojnë se Charles është më pak i popullarizuar se nëna e tij, Mbretëresha Elizabeth. Sipas YouGov, në vitin 2012 73% e qytetarëve thanë se monarkia ishte e mirë për Britaninë, por kjo shifër tani ka rënë në 53%.
Smith beson se respekti britanik për Mbretëreshën e bëri atë një “pengesë” për qëllimin e lëvizjes antimonarki.
“Mendoj se monarkia po përballet me shumë probleme, sepse ata kanë humbur yllin e tyre, mbështetja (për institucionin) është dukshëm në rënie, interesi është në rënie dhe ky është një problem i madh për ta”, vëren ai.
Por protestat kundër monarkisë tërheqin një numër të vogël njerëzish, pasi shumica e britanikëve ende duan që familja mbretërore të ekzistojë.
Gjithsesi, edhe mbështetja për monarkinë po pakësohet, me të rinjtë më pak të interesuar për institucionin sesa të moshuarit.
Një sondazh i YouGov, i kryer në prill, zbuloi se vetëm 9% e qytetarëve janë shumë të interesuar për kurorëzimin e Charles-it.
Në ditën e kurorëzimit janë planifikuar edhe demonstrata kundër monarkisë në qytetet skoceze dhe Uells.
Kreu i ri i qeverisë skoceze, Humza Yousaf, ka thënë se dëshiron që monarkia të shfuqizohet. Të njëjtin mendim ka edhe kreu i qeverisë së Uellsit, Mark Drakeford.
Smith beson se mbështetja për familjen mbretërore do të vazhdojë të bjerë dhe se qeveria e ardhshme do të vendosë përfundimisht të mbajë një referendum për monarkinë.
“Të rinjtë po largohen masivisht nga familja mbretërore”, vëren ai. “Mbretëresha përfaqësoi monarkinë për kaq shumë njerëz (…) Tani që ajo nuk është këtu, ajo nuk mund ta mbrojë më monarkinë,” përfundon ai. /tesheshi.com/
