Nga Blendi Gashi
Kryeministri, Ramush Haradinaj ka bërë premtime të mëdha gjatë fushatës zgjedhore, ku brenda tre muajsh ka thënë se do t’i japë fund temave të mëdha, siç janë: Demarkacioni me Malin e Zi, liberalizimi i vizave dhe themelimi i ushtrisë.
Ai po ashtu ka premtuar luftën ndaj krimit e korrupsionit, rritjen e pagave me 30 për qind, rritjen e pensioneve për 25 për qind, uljen e importit me Serbinë, rifunksionalizimin e “Trepçës” dhe se do të gjejë zgjidhje për pensionistët minatorë, brenda 90 ditëve të para të qeverisjes.
Pë të realizuar disa nga këto premtime, konkretisht bërjen e ushtrisë, heqjen e vizave dhe gjetjen e një zgjidhjeje për Demarkacionin, Haradinajt i kanë mbetur pak më shumë se dy muaj.
Duke parë se muaji i parë i qeverisë së re gati iku, analistët politikë shprehen skeptikë se kryeministri do mbajë fjalën dhe do t’i realizoi premtimet e bëra, përveç faktit se për disa vendime i duhen votat e opozitës dhe të Listës Serbe. Kjo e fundit duhet të japë votën për ushtrinë, për të cilën ka thënë se nuk do e mbështesë.
Shemsi Jashari, analist politik, thotë se temat e mëdha nuk mund të shtyhen përpara pa një unifikim të fatkorit politik shqiptar dhe veçanërisht ushtria nuk mund të themelohet pa mbështetjën e Listës Serbe.
“Do të jetë shumë vështirë për z.Haradinaj të përmbushë axhendën e tij ambicioze për themelimin e ushtrisë e cila kërkon 2/3 e pakicave, pastaj Demarkacionin, i cili kërkon një rinegocim dhe rënie dakort nga pala Malazeze, dhe liberalizimin e vizave, e cila vjen pas përmbushjës së këtyre dy ta parave.
z. Haradinaj ka një dinamik shumë më aktive se pararëndësi i tij z. Mustafa por temat e mëdha nuk varen vetëm nga dëshira dhe vullneti i madh i tij por edhe nga mbështetja e faktorëve që nuk i kontrollon ai”, thotë Jashari për tesheshi.com.
Sa i përket premtimeve për punësim, Jashari beson se qeveria “Haradinaj” do të ketë një sukses të kufizuar, pasi thotë se shumicën e rezistencës ndaj presionit të opozitës dhe energjisë do ta shpenzojë konkretisht në temat e mëdha të lartpërmendura.
Edhe Faik Krasniqi, njohës i rrethanave politike, mendon se themelimi i ushtrisë do jetë një prej çështjeve më komplekse për qeverinë e re, për çka thotë se është i vetëdijshëm edhe kryeminsitri.
Ndërsa për temat si Demarkacioni e vizat, Krasniqi i sheh më lehtë të realizueshme, nëse ekziston vullneti politik nga ana e kryeministrit Haradinaj dhe kabinetit të tij.
“Demarkacioni lidhet direkt me liberalizimin e vizave që janë vënë si kusht nga BE-ja. Demarkacioni është kauzë shpirtërore e z.Haradinaj, dhe ai duhet të gjejë një zgjidhje rreth kësaj çështje, sepse është e padrejtë për një të tillë, që mund të ketë zgjidhje, qytetarët e Kosovës të ngelin më të izoluarit në kontinentin evropian. Liberalizimi i vizave ka qenë edhe një nga premtimet e tij, që brenda 3 muajve pas krijimit të qeverisë, qytetarët do të udhëtojnë pa viza drejt BE-së”, thotë Krasniqi për tesheshi.com.
Kurse sa i përket premtimeve për zbutjen e papunësisë, Krasniqi thotë nuk e di nëse Haradiaj ka ndonjë strategji të mirëfilltë për krijimi e vendeve të reja të punës.
“Stimulimi i bizneseve të vogla dhe të mesme, si dhe krijimi i atyre të reja nga Fondi shtetëror i Investimeve, do të ishin një strategji e mirë për hapjen e vendeve të reja të punës”, thotë Krasniqi. /tesheshi.com/
