Nga Blendi Gashi
Ndërsa kanë mbetur edhe pak orë deri në mbërritjen e trenit serb në veri të Mitrovicës, e të nisur në mëngjes nga Beogradi, forca të mëdha të policisë së Kosovës, konkretisht Njësia Speciale, raportohet t’ia kenë mësyrë Jarinjes.
Ndërkohë, një video po qarkullon në rrjetet sociale, ku shihen forca të shumta policore duke shkuar në drejtim të veriut.
Sipas raportimeve të mediave kosovare, policia nuk do ta lejojë hyrjen e trenit në veri, pasi paraprakisht nuk është marrë leje nga institucionet, dhe, mbi të gjitha, treni është i mbuluar me parulla që cenojnë sovranitetin e shtetit, si “Kosova është Serbi”.
I pari që ka reaguar nga krerët e shtetit është presidenti, i cili ka kërkuar nga institucionet e vendit të mos lejojnë që treni të hyjë në territorin e shtetit.
Më vonë ka ardhur edhe reagimi i ministrit të Brendshëm, Skënder Hyseni, i cili ka deklaruar për mediat kosovare se, “jemi të gatshëm ta ndalojmë trenin”.
Një gjë të tillë e ka kërkuar më pas dhe deputeti i PDK-së, Adem Grabovci.
Në të njëjtën kohë, ka patur reagime të shumta nga deputetë të opozitës e analistë politikë, duke kërkuar nga qeveria të mos e lejojë hyrjen e trenit në vend.
Autoriteti Rregullativ i Hekurudhave ka kërkuar zyrtarisht nga Ministria e Infrastrukturës, nga Ministria e Punëve të Brendshme dhe nga policia e Kosovës të ndalojnë hyrjen e trenit serb, pasi thotë se ligji i ndalon operatorët që nuk janë të licencuar t’i shfrytëzojnë hekurudhat e Kosovës. Duke shtuar gjithashtu se hekurudha Mitrovicë – Leshak është e rrezikshme, pasi nuk ka mirëmbajtje.
Ky institucion e ka bërë të qartë se asnjë operator i Serbisë nuk ka leje për të hyrë në Kosovë, e rrjedhimisht edhe treni i nisur nga Serbia është ilegal dhe i palicensuar në Kosovë.
Ndërsa është kritikuar heshtja e plotë e kryeministrit Mustafa, raportohet se ai me ministrat e kabinetit qeveritar që nga mëngjesi kanë qëndruar në zyrë, ku kanë diskutuar për “trenin ilegal”.
Ndërkaq, për çështjen në fjalë, përmes rrjeteve sociale, është thirrur një protestë pasdite para qeverisë, ku protestuesit kanë kërkuar largimin e saj, të presidentit dhe kryeparlamentarit, pasi, siç thonë ata, “s’po janë në gjendje ta ndalin trenin e Serbisë”.
Përndryshe, kryeministri i Serbisë, Aleksandër Vuçiq, do t’u drejtohet mediave përmes një konference për gazetarë në orën 18:30. Kështu është bërë e ditur nga zyra për marrëdhënie me mediat në qeverinë e Serbisë.
Pos kësaj, mediat serbe po raportojnë se “treni aktualisht gjendet në Rashkë” dhe se mund të kthehet në Beograd, pasi, sipas tyre, “po përgatitet sulm terrorist në Kosovë”.
Treni serb është paraparë të mbërrijë në Mitrovicë rreth orës 19:00. /tesheshi.com/
