Përçahet mazhoranca për reformën më të rëndësishme në dy vjet qeverisje të së majtës, siç është reforma në drejtësi.
Lëvizja Socialiste për Integrim i ka dërguar Komisionit të Venecias një draft të gjatë e të plotë, ku thuajse
e rrëzon të gjithë draftin e përgatitur nga komisioni i lartë i ekspertëve.
Konkretisht, Lëvizja Socialiste për Integrim rrëzon dy pikat më të rëndësishme të ndryshimeve kushtetuese, që kanë të bëjnë me përvijimin e ligjeve të Shqipërisë.
Kështu, LSI-ja kundërshton qartë e prerë caktimin e një kryeprokurori të fuqishëm dhe jetëgjatë të Republikës, me një mandat 9-vjeçar.
Në draftin e dërguar në Komisionin e Venecias, LSI-ja thekson se mandati 9-vjeçar është i gjatë dhe i pajustifikueshëm.
Ndërkaq, LSI-ja ka kundërshtuar edhe pjesën e administratës publike dhe të emërimit të gjyqtarëve. Në
draftin e komisionit të ekspertëve të nivelit të lartë, ku bëjnë pjesë edhe krerët e misionit të EURALIUS-it dhe OBDAD-it, theksohet se gjykatës emërohet një jurist me eksperiencë 20-vjeçare. Kurse LSI-ja e rrëzon këtë, duke theksuar se kështu përjashtohen të shkolluarit gjatë 20 viteve të fundit, të cilët mund të kenë maksimalisht një përvojë 15-vjeçare.
Gjithashtu LSI-ja rrëzon edhe pjesën e ngjizjes së Kushtetutës së Shqipërisë me atë të Bashkimit Europian. Në draftin që partia e Ilir Metës dërgon në Komisionin e Venecias theksohet se e drejta e BE-së nuk mund të mbivendoset mbi atë të Republikës së Shqipërisë.
Materiali i Mazhorancës
GENL është e vetëdijshme se mandati i Prokurorit të Përgjithshëm (PP) mund të ndërpritet vetëm në rrethana shumë të veçanta. Sidoqoftë, nisur nga fakti se reforma e propozuar për sistemin e prokurorisë dhe PP-së në veçanti, në qoftë se miratohet, do të sjellë rikonceptimin tërësor, strukturor dhe funksional, të sistemit të prokurorisë, të kompetencave të PP-së, të mënyrës së përzgjedhjes dhe të emërimit të tij, të kohëzgjatjes së mandatit kushtetues të PP-së, të procedurave për shkarkimin e tij, ndryshimin e kërkesave dhe kritereve profesionale (duke përfshirë nivelin më të lartë të arsimimit, që përputhet me fokusin e pozicionit për të përfaqësuar akuzën përpara Gjykatës së Lartë lëshimin e udhëzimeve me shkrim) që duhet të përmbushin kandidatët për PP, ngritjen në nivel kushtetues të Këshillit të Prokurorisë dhe strukturimin tërësor të kompetencave të tij (Këshillit) për emërimin, karrierën, ngritjen në detyrë dhe disiplinimin e prokurorëve, të ndryshme nga rregullimi aktual kushtetues dhe ligjor, ndryshimin e raporteve hierarkike brenda sistemit të prokurorisë dhe daljen më vete të një pjese të portofolit aktual të PP-së me krijimin e strukturës së posaçme antikorrupsion. GENL gjykon se është e nevojshme të parashikohen dispozita kushtetuese tranzitore për përfundimin para kohe të mandatit të PP-së. /tesheshi.com/
