Një raport, i bërë publik sot nga Këshilli Norvegjez i Refugjatëve dhe Qendra e Monitorimit të Zhvendosjes së Brendshme, hedh dritë mbi numrin e jashtëzakonshme të të zhvendosurve në botë vitin e shkuar brenda kufijve të vendeve të tyre.
8.6 milionë njerëz janë zhvendosur për shkak të konflikteve dhe dhunës, me gjysmën prej tyre gjatë 2015-ës në Jemen, Siri e Irak.
Jemeni, ku forcat qeveritare luftojnë me rebelët husinjë, kishte mbi 2.5 milionë të zhvendosur në fund të dhjetorit të vitit 2015.
Nga 6.6 milionë të zhvendosurit brenda Sirisë gjatë konfliktit pesëvjeçar, 1.3 milionë i përkasin vitit të shkuar.
Ndërsa, në Irak, numri i të zhvendosurve brenda tij gjatë kësaj periudhe ishte 1.1 milionë.
Jashtë kufijve të Lindjes së Mesme, vendet me zhvendosje më të madhe të brendshme të popullsisë qenë Afganistani, Republika e Afrikës Qendrore, Kolumbia, Republika Demokratike e Kongos, Nigeria, Sudani i Jugut dhe Ukraina.
Një numër akoma më i madh të zhvendosurish brenda vendit është për shkak të katastrofave natyrore. 19.2 milionë njerëz janë detyruar të lënë shtëpitë e tyre e të zhvendosen gjatë vitit të kaluar nga katastrofat natyrore.
India, Kina dhe Nepali mbajnë vendet e para për popullsinë e zhvendosur brenda kufijve të tyre. 3.7 milionë është ky numër në Indi, 3.6 milionë në Kinë, e 2.6 milionë në Nepal.
Mbledhur së bashku, numri i të zhvendosurve brenda vendit për 2015-tën, si nga lufta, konfliktet, dhuna e katastrofat natyrore, është 27.8 milionë. /tesheshi.com/
