Është shuar tjetër oligark rus, duke iu shtuar një liste thrilleri para dhe pas agresionit ndaj Ukrainës. Bëhet fjalë për Aleksandër Subotin, i cili vdiq këtë fundjavë në rrethana misterioze.
Subotin është ish-drejtori ekzekutiv i kompanisë ruse të naftës Lukoil dhe është i fundit në një seri oligarkësh rusë që vdiqën në rrethana të dyshimta pas pushtimit rus të Ukrainës.
Ai u gjet i vdekur në bodrumin e shtëpie shamane në Mytishchi, një qytet në verilindje të Moskës, pasi dyshohet se pësoi një atak në zemër, njoftoi agjencia ruse e lajmeve TASS. Thuhet se një hetim për vdekjen e tij është hapur.
Miliarderi, siç tha burimi për TASS, shkoi në shtëpi në gjendje të dehur të rëndë, pasi kishte konsumuar drogë dhe alkool një ditë më parë. Trupi i tij u zbulua në një dhomë bodrumi që dyshohet se përdorej për “ritualet vudu xhamajkane”, raportuan mediat ruse.
Mediat vendase shkruajnë se Subotin shkoi te një shaman në kërkim të një kure për hangover, e cila dyshohet se përmbante helmin e një bretkose zhaba. Të nesërmen në mëngjes, ai u gjet i vdekur nga shamanët Magua Flores (emri i vërtetë Alexei Pinjurin) dhe Tina Cordoba (emri i vërtetë Kristina Teihrib), sipas raporteve lokale, duke cituar një version të ngjarjeve të favorizuar nga autoritetet ruse.
Çifti thuhet se shëron klientët duke thirrur fantazma dhe duke sakrifikuar kafshë, trupat e të cilëve më pas zhyten në gjakun e gjelave.
Megjithatë, për të gjitha këto pretendime nuk ka një konfirmim nga policia, ndërsa detajet e tjera se çfarë e shkaktoi vdekjen e tij kanë mbetur të panjohura që nga pasditja e së hënës. Ccifti i martuar shaman u tha hetuesve shtetërorë se Subotin ishte miku i tyre dhe mohuan që ata t’i kishin nënshtruar ritualeve shamanike për para.
Autoritetet ruse kanë nisur një hetim penal për vdekjen e Subotin ndërsa përpiqen të përcaktojnë shkakun e saj, raporton TASS.
Vdekja e tij vjen vetëm disa muaj pasi Lukoil bëri thirrje për një fund të shpejtë të luftës midis Rusisë dhe Ukrainës. Lukoil është kompania e dytë më e madhe ruse e naftës.
Subotin është një në serinë e oligarkëve të vdekur, duke bërë që lista e të pasurve rusë që përfunduan në rrethana të paqarta të rritet që nga fillimi i pushtimit. Ka pasur shumë dyshime mbi këto vetëvrasje apo vrasje, si dhe vetëvrasje familjare (bashkë me tre oligarkë janë gjetur edhe trupa grash e fëmijësh), apo se në fakt janë likuidime të urdhëruara nga Kremlini që janë bërë për t’u dukur si vrasje apo vetëvrasje brenda familjes.
Trupi i Sergei Protosenye, ish-zëvendës president dhe financier kryesor i Novatek, një kompani e madhe gazi pjesërisht në pronësi të Gazprom, u gjet i varur në kopshtin e një vile me qira në Spanjë më 22 prill. Gruaja dhe vajza e tij u gjetën të vdekur në shtretërit e tyre me plagë me thikë. Djali i tij Fedor, 22 vjeç, shprehu skepticizëm në versionin e vrasjes dhe vetëvrasjes familjare.
Një ditë më parë, Vladislav Avayev, ish-zëvendëspresident i Gazprombank dhe një ish-zyrtar në zyrën e presidentit dhe në Dumën ruse, u gjet i vdekur me një armë në dorë dhe një plagë me armë zjarri në banesën e tij në Moskë më 18 prill. Sipas disa raportimeve, bashkë me të janë gjetur të vdekur gruaja e tij shtatzënë Jelena dhe vajza 13-vjeçare Marija. Të tre kishin plagë me armë zjarri.
Më pak se një muaj më vonë dhe një ditë pas fillimit të pushtimit të Ukrainës, më 25 shkurt, zëvendësdrejtori i Gazprom Alexander Tyulakov, 61 vjeç, u gjet i varur në të njëjtën lagje të rrethuar për të pasurit, në garazhin e një shtëpie luksoze.
Miliarderi Vasily Melnikov, drejtor i kompanisë së furnizimeve mjekësore MedStom, u gjet i vdekur me gruan e tij 41-vjeçare Galina dhe dy djemtë e vegjël (i madhi ishte 10 vjeç dhe i vogli 4) në shtëpinë e tyre miliona dollarëshe në Nizhny Novgorod. Të tre kanë marrë plagë me thikë, ndërsa Melnikovit i ishte prerë arteria.
Është gjithashtu e paqartë se si vdiq Mikhail Watford, i cili jetoi në Britani dhe e bëri pasurinë e tij në biznesin e gazit dhe naftës në Rusi, i njohur për korrupsionin dhe lidhjet me Kremlinin.
Një tjetër vdekje që u përfol në media si e pashpjegueshme ndodhi tre javë para pushtimit rus. Bëhet fjalë për vdekjen e Leonid Shulman, drejtor transporti i Gazprom Invest, krahut financiar të Gazprom, i cili u gjet më 30 janar në vilëzën e tij në vendbanimin Leninsky, pranë Shën Petersburgut. /tesheshi.com/
