Kryetari i Bordit të Drejtorëve të prodhuesit të dytë më të madh rus të naftës Lukoil, Ravil Maganov, u gjet i vdekur kur në rrethana të paqarta ra nga dritarja e një spitali në Moskë.
Disa media ruse raportuan gjithashtu vdekjen e 67-vjeçarit Maganov, i cili ishte edhe nënkryetar i Lukoil, duke cituar burime të paidentifikuara.
67-vjeçari Maganov u shtrua në një repart në katin e 6-të të Spitalit Klinik Qendror në rrugën “Marshala Timoshenko”.
Nuk dihet se çfarë e ka shkaktuar rrëzimin e biznesmenit.
Në fillim të marsit, bordi i Lukoil bëri thirrje për t’i dhënë fund konfliktit në Ukrainë sa më shpejt të jetë e mundur, duke shprehur solidaritetin e tij me viktimat e “kësaj tragjedie”.
Maganov mori pozicionin e zëvendëspresidentit ekzekutiv për Eksplorimin dhe Prodhimin në Lukoil në 2006.
Ai është anëtar i Bordit të Drejtorëve që nga viti 1993 – menjëherë pas themelimit të kompanisë – dhe është një ekspert i dalluar i naftës dhe gazit natyror të Federatës Ruse.
Ai u bë president i kompanisë në vitin 2020.
Ndër nderimet që ai kishte marrë ishte edhe Çmimi i Qeverisë së Federatës Ruse për Shkencën dhe Inxhinierinë.
Vëllai i Ravil-it drejton prodhuesin e mesëm rus të naftës Tatneft.
Ravil Maganov nuk është oligarku i parë rus që vdes në rrethana të paqarta.
Korrikun e kaluar, biznesmeni milioner Yuri Voronov u gjet i vdekur në shtëpinë e tij, me një plagë me armë zjarri në kokë, në një periferi të pasur të Shën Petersburgut.
Voronov, 61 vjeç, ishte kreu i një kompanie që punonte me Gazprom në Arktik.
Në maj, një ish-ekzekutiv i lartë i Lukoil-it, Alexander Shubotin, gjithashtu thuhet se vdiq në rrethana të pazakonta në moshën 43-vjeçare.
Mediat lokale raportuan se ai pësoi një atak në zemër pasi konsumoi sanëz, një barishte që mund të shkaktojë një ritëm të parregullt të zemrës tek disa njerëz.
Gjithsej 7 oligarkë rusë, disa prej të cilëve ishin aktivë në sektorët e naftës dhe gazit, vdiqën në vitin 2022 në rrethana misterioze.
Siç u bë e ditur sot, autoritetet kompetente të SHBA-së kanë në dorë një urdhër për sekuestrimin e një avioni me vlerë 45 milionë dollarë të PJSC ruse Lukoil.
Avioni fluturoi drejt dhe nga Rusia në kundërshtim me sanksionet e Departamentit të Tregtisë së SHBA-së kundër Moskës. /tesheshi.com/
