Bashkimi Europian duhet të liberalizojë sa më shpejt regjimin e vizave me Kosovën pasi janë përmbushur standardet bazë dhe është në interes të perspektivës europiane të gjithë Ballkanit – kjo thirrje iu adresua ligjvënësve të Parlamentit Europian përmes komisionierit për emigracionin, Dimitris Avramopulos.
Bashkimi Europian po humb kredibilitetin me rezistencën e tij kundrejt liberalizimit të regjimit të vizave me Kosovën – konkluduan Avramopoulos, por dhe raportuesja për Kosovën, Tanja Fajon.
“Kosova është i vetmi partner në Ballkanin Perëndimor që nuk po përfiton nga marrëveshja për lëvizjen e lirë, bashkë me qytetarët e saj. E di që disa vende kanë rezerva për risqet e emigracionit nga Kosova, edhe ata vetë janë dijeni të tyre. Por ne duhet ta inkurajojmë vendin të plotësojë më tej kriteret e mbetura, të forcojë kornizën ligjore, dhe t’ua komunikojë qartësisht qytetarëve të tij të drejtat dhe detyrimet që burojnë nga regjimi pa viza. Tani na mbetet neve të biem dakord sa më shpejt që ky proces të përmbyllet”, tha Avramopoulos.
Si ky i fundi e si znj. Fajon, apeluan ligjvënësit europianë t’i japin dritën jeshile procesit të liberalizimit të vizave me Kosovën, i nisur që në vitin 2012. /tesheshi.com/
