Parlamenti Evropian u ka bërë thirrje shteteve që përdorin shërbimet e grupit mercenar rus Wagner që të ndërpresin të gjitha lidhjet me kompaninë private, e cila dyshohet se është e afërt me presidentin Vladimir Putin.
Në një tekst jodetyrues të miratuar me 585 vota (40 kundër, 43 abstenime), eurodeputetët u bënë thirrje “të gjitha vendeve që përdorin shërbimet e Grupit Wagner dhe filialeve të tij, veçanërisht Republikën e Afrikës Qendrore, të ndërpresin të gjitha lidhjet me këtë grup”.
Parlamenti Evropian dënon “krimet e tmerrshme” të këtij grupi, prania e të cilit është e regjistruar në Ukrainë, Siri dhe Sudan dhe vendet perëndimore i frikësohen ndërhyrjes së këtij grupi në Mali.
Shumë OJQ dhe gazetarë besojnë se Rusia po përdor grupin dhe mercenarët e saj për t’i shërbyer interesave të saj jashtë vendit, gjë që Moska e refuzon.
“Grupi Wagner dhe kompanitë e tjera të sigurisë të udhëhequra nga Rusia duhet të shihen duke vepruar në emër të shtetit rus,” thanë ligjvënësit.
Përfaqësuesi i Lartë i Bashkimit Evropian për Punët e Jashtme dhe Politikën e Sigurisë, Josep Borrell njoftoi në mes të nëntorit se ishte arritur një konsensus brenda vendeve të BE-së për të sanksionuar Grupin Wagner.
Parlamenti Evropian ka kërkuar që sanksionet të përfshijnë një ndalim udhëtimi dhe një ngrirje të fondeve të përfaqësuesve të grupit. /tesheshi.com/
