Ukraina ka nevojë për “financim të qëndrueshëm dhe të parashikueshëm” në 2024 dhe më tej për të fituar luftën, tha presidentja e Komisionit Evropian Ursula von der Leyen, duke tërhequr vëmendjen për rrezikun e lodhjes midis aleatëve të Kievit përballë agresionit rus.
“Ukraina mund ta fitojë këtë luftë”, tha ajo \ nga Forumi Ekonomik Botëror në Davos. “Por ne duhet të vazhdojmë t’i japim asaj mjetet për të luftuar.”
“Ukrainasit kanë nevojë për financim të parashikueshëm gjatë vitit 2024 dhe më tej,” theksoi zyrtarja e ;artë europiane dy javë përpara një samiti evropian që do të fokusohet në ndihmën evropiane për Kievin, një ndërmarrje e vështirësuar nga kërcënimi i një vetoje hungareze.
“Ata kanë nevojë për një furnizim të vazhdueshëm dhe efikas të armëve për të mbrojtur vendin e tyre dhe për të rimarrë territoret e tyre legjitime,” theksoi gruaja gjermane në krye të KE-së.
Duke kujtuar se Bashkimi Evropian vendosi në dhjetor të nisë negociatat e anëtarësimit me Ukrainën, Ursula von der Leyen deklaroi se pranimi i Ukrainës do të jetë një hap historik për vendin dhe një përgjigje ndaj thirrjes së historisë për Evropën.
Duke adresuar një paralajmërim për tentativat për dezinformim, veçanërisht të shumta në rastin e Ukrainës, presidentja e Komisionit Europian këmbënguli në humbjet e Rusisë që nga fillimi i pushtimit të saj kundër Ukrainës.
“Rusia nuk i ka arritur qëllimet e saj strategjike (…) Rusia ka dështuar ekonomikisht. Sanksionet e kanë izoluar ekonominë e saj nga teknologjitë e reja dhe inovacioni. Së fundi, Rusia ka dështuar në nivelin diplomatik”, tha ajo, duke iu referuar anëtarësimit të Finlandës në NATO, që së shpejti do të pasohet nga Suedia. /tesheshi.com/
