Beogradi ka sulmuar Edi Ramën pas fjalës së tij në Asamblenë e Përgjithshme të Kombeve të bashkuara, ku kryeministri shqiptar kërkoi që Serbia të njohë pavarësinë e Kosovës.
Ka qenë ambasadori i Serbisë në OKB, Milan MIlanoviç, i cili deklaroi se “Edi Rama ka abuzuar me institucionin e OKB”-së”.
Siç bën të ditur televizioni publik serb, RTS, Milanoviç tha se “Rama ka mashtruar anëtarët e OKB-së sepse kemi të bëjmë me një proces negocimi mes Beogradit dhe Prishtinës me ndërmjetësimin e Bashkimit Europian, negocim që do të zgjidhë çdo gjë në marrëdhëniet dypalëshe”.
Ambasadori serb në pallatin e qelqtë ka qenë mjaft i irrituar nga fjalimi i Ramës, për arsye se sipas tij nuk mund të flitet për një vend sovran, i cili nuk është anëtar i organizatës së Kombeve të Bashkuara.
Kryeministri shqiptar, Edi Rama, në fjalimin e tij në emër të Shqipërisë në Asamblenë e Përgjithshme të OKB-së i bëri thirrje Beogradit të njohë pavarësinë e Kosovës, pasi sipas tij “kjo do të jetë e mirë dhe për Beogradin”.
Por pikërisht kjo frazë ka irrituar autoritetet serbe, të cilët megjithatë i janë përgjigjur deri tani vetëm në nivelin diplomatik.
Ky është reagimi i dytë brenda javës nga ana e Beogradit, pas notës së dorëzuar në Asamblenë e Përgjithshme dhe Sekretariatin e OKB-së, pas marrjes pjesë së delegacionit të Kosovës në Samitin Kundër Ekstremizmit të Dhunshëm që u zhvillua në suazat e Organizatës së Kombeve të Bashkuara.
Në fjalën e mbajtur në Asamblenë e Përgjithshme të OKB-së, Rama tha se “Pas vitesh me luftëra e konflikte, vitin e kaluar nuk drejtuam armët ndaj dritareve të fqinjve. Ballkani ka hyrë në një proces paqeje dhe iu bëjmë thirrje atyre vendeve që s’e kanë njohur Kosovën ta bëjnë këtë. Njohja e Kosovës do të jetë mirë edhe për vetë Serbinë”. /tesheshi.com/
