Nga Memedali Jusufi
Çaktivizimi i “bombave” të përgjimeve nga Gjykata Themelore në Shkup dy ditë më parë, është një sinjal që Marrëveshja e Përzhinos është e rrezikuar.
Sekretari shtetëror për çështje evropiane në MPJ-në, francezi Arlem Dezir, pas takimeve me z/kryeminsitrin e Maqedonisë, Fatmir Besimi dhe shefin e diplomacisë, Nikolla Popovski, deklaroi se të gjithë faktorët politikë duhet t`i përmbahen Marrëveshjes së Përzhinos, sidomos raportit të Komisionit Evropian të eurokomesarit për zgjerim, Pribes.
Aq më tepër pas rekomandimeve të shumta të cilat do të garantojnë shtet juridik, respektim të lirive fundamentale, ndarjes së pushteve të ndryshme në RM, veçanërisht pavarësi në sistemin gjyqësor.
Por e gjitha kjo u vu në dyshim sidomos pasi Gjykata Themelore në Shkup hodhi poshtë si të pabaza provat e opozitës për rastin e përgjimeve. Në lidhje me këto kundërthënie politike, ne morëm opinionin e analistit politik në Maqedoni, Ibrahim Mehmeti, i cili për portalin tesheshi.com u shpreh se gjithë kjo që po ndodhe prej 1 shtatorit, kur pritej fillimi konkret i zgjidhjes së krizës politike, është indikator i qartë se faktorët e brendshëm politikë nuk e kanë marrë me seriozitet Marrëveshjen e Përzhinos.
“Kuptohet se këtu qeveria dhe institucionet tjera kanë përgjegjësi të madhe për suksesin e kësaj marrëveshjeje. Minimi i marrëveshjes, qoftë nëpërmjet akuzave të ndërsjellta, ende pa u ulur në tavolinën e negociatave, qoftë nëpërmjet vendimeve gjyqësore të cilat ja humbin kuptimin asaj, tregojnë se edhe më tutje do të jetë e domosdoshme një ndërhyrje nga faktori ndërkombetar. Tani ndoshta në mënyrë edhe më intensive se sa para marrëeshjes”, ka deklaruar Mehmeti
Nga ana tjetër, edhe gazetari Arben Zeqiri është skeptik për respektimin e marrëveshjes në fjalë, aq më tepër që qeveria edhe më herët kishte dhënë prova për injorim të marrëveshjeve të mëhershme.
“Pa dashur të nënvlerësoj pozicionin e zotit Arlem Dezir, patjetër më duhet të them se VMRO dhe Gruevski kanë injoruar mesazhe edhe më direkte të figurave edhe më të fuqishme ndërkombëtare. Qeveria aktuale i bën karshillëk Marrëveshjes së Perzhinos me propozime dhe iniciativa të veta. Prokurori Special, edhe nëse zgjidhet, ai vetëm do të përgatis lëndën, do të ngre padinë, ja të themi do të urdhërojë edhe arrestimin e zyrrtarëve të korruptuar; por megjithatë fjalën e fundit e kanë gjykatësit. A mund të jemi te sigurt për drejtësi nga gjykatësit nëse nuk ishim të sigurt për prokurorin? Këtu ka një shpresë të vogël, që reformimi i gjyqësorit sipas rekomandimeve të Pribes të bëhet para se Prokurori Special të procesojë lëndët, por kjo duket edhe me e komplikuar”, tha Zeqiri. /tesheshi.com/
