Ajo çfarë ka ndodhur në Theth, një batërdi ndërtimesh pa leje, ndodhur nën hundën e shtetit, e që po ka si pasojë cenim të turizmit e sigurisht dhe dhimbje njerëzore këto ditë, si pasojë e prishjeve, ka sjellë shkrirjen e Komisariatit të Shkodrës.
Kështu, Drejtori i Drejtorisë Vendore Shkodër, Fatmir Lleshaj, dhe shefi i Komisariatit Nik Nikolla janë shkarkuar nga detyra. Nga detyra është pezulluar dhe shefi i stacionit të policisë në Theth, ndaj të cilit ka nisur edhe një hetim disiplinor. Shkak i këtij vendimi janë bërë ndërtimet pa leje në Theth dhe zaptimi i hapësirave publike.
Drejtori i Përgjithshëm i Policisë së Shtetit, Ilir Proda, në një deklaratë për mediat, teksa njoftoi shkarkimet, paralajmëroi edhe drejtuesit e qarqeve të tjera që do të mbajnë përgjegjësi nëse konstatohen shkelje.
“Nisur nga situata e fundit e krijuar me ndërtimet në qendër të Theth, kam urdhërua për të kryer një hetim të thelluar, dhe ju informoj se shefi i stacionit të Policisë Theth është pezulluar menjëherë nga detyra dhe ndaj tij ka nisur procedurat disiplinore.
Besoj se si funksion me mosveprimin e tij të pa justifikueshëm, e ka zgjedhur rrugën e tij për të mos qenë pjesë e policisë së shteti dhe nuk gjej më asnjë arsye që ai të veshë më uniformën e policisë.
Ecuria disiplinore ka filluar edhe ndaj inspektor të zonës dhe ndaj specialistëve të krimit, të cilët po njësoj nuk e meritojnë të jenë pjesë e Policisë së Shtetit.
Përgjegjësia për ndërtimet pa leje nuk mund të mbetet përgjegjësi e vetme e një inspektori zone dhe specialisti krimi, ndaj kam vendosur të shkarkoj nga detyra, Drejtorin e Drejtorisë Vendore Shkodër, si dhe shefin e Komisariatit të Policisë Shkodrës”, tha Proda.
E gjitha kjo po ndodh nën një furtunë të beftë nga Rama, lëshuar me nervozitet ndaj pushtetit lokal, duke vërtetuar se dhe pas 12 vitesh qeverisjeje, shteti i tij është po aq i mjerë, i paaftë e i korruptuar, siç pretendoi se e morri në 2013-ën, me premtimin për ta reformuar e bërë një shtet model.
Ndaj, furtuna e tij po shpërfaq dështtimin e tij! /tesheshi.com/
