Prokuroria shqiptare për herë të parë ka lëvizur pas reagimit të publikut dhe familjarëve të viktimës.
Bëhet fjalë për vrasjen e Marvi Mihalit, 22-vjeçarit që u godit me thikë nga disa bashkëmoshatarë për një celular.
Prokuroria pas disa kohë hetimesh liroi të arrestuarit për vrasjen e te riut Mihali, por kjo shkaktoi reagimin e fortë të prindërve të të ndjerit dhe publikut në rrjetet sociale.
Pas këtij reagimi, akuza ndryshoi qëndrim dhe riarrestoi të ndaluarit duke e forcar aktakuzën ndaj tyre.Gjykata ka pranuar kërkesën e prokurorit të ri që po heton vrasjen e 22-vjeçarit Marvi Mihali për të rikthyer në burg tre të rinjtë që u liruan në datë 11 maj.
Pak ditë më parë gjykata vendosi që të lironte nga burgu Eugen Bitrajn, Kridens Allën dhe Marsel Allën, ndërsa i vetmi që mbeti në qeli është Dejvi Bitraj.
Por pas kallëzimit të babait të 22-vjeçarit Pavllo Mihali, me kërkesë të prokurorit të ri të cështjes Gjergji Tako, gjykata pranoi kërkesën që të rinjtë të kthehen në qeli.
Tre të rinjtë që u liruan fillimisht u akuzuan për ‘Mos kallëzim krimi’, por prokurori Tako kërkoi riarrestimin e tyre me akuzën e ‘Vrasjes në bashkëpunim’.
Pavllo Mihali, babai i 22-vjeçarit Marvi Mihali që u vra me thikë më 31 korrik 2017, denoncoi në prokurorinë e Krimeve të Rënda prokurorin e çështjes Artan Lulaj, dy gjyqtarët Bedri Qorri dhe Sokol Pasho dhe oficerin e policisë gjyqësore Kliton Zharri si të korruptuar.
Mihali akuzoi se ata kanë marrë ryshfet për të liruar nga burgu 3 nga 4 të rinjtë e arrestuar për vrasjen e djalit të tij. Sipas tij, prokurori dhe gjyqtarët këmbyen gjakun e tij me shumat me para që morën.
Pas vendimit të gjykatës, i ati i viktimës u shpreh për mediat se “Presim të vendoset drejtësia plotësisht”. /tesheshi.com/
