Duke folur për herë të parë si një kryeministre e Britanisë, Theresa May ka deklaruar këtë pasdite se do të drejtojë qeverinë e “një kombi”, duke premtuar një bashkim të të gjithë qytetarëve britanikë.
Ajo ka shprehur vendosmërinë e saj për të ruajtur bashkimin midis Anglisë, Skocisë, Uellsit dhe Irlandës së Veriut.
Theresa May është bërë e dyta femër, pas Margaret Thatcher-it, që e drejton qeverinë britanike. Ajo e mori drejtimin e konservatorëve dhe u bë kryeministre e vendit pasi rivalja e saj, Andrea Leadsom, u tërhoq dy ditë më parë nga gara.
“Së bashku do të ndërtojmë një Britani më të mirë,” tha ajo në fjalën e vet, me premtimin se qeveria e saj nuk do të vihej në lëvizje nga interesat e një numri të vogël të privilegjuarish.
May do ta mbante fjalën në Downing Street menjëherë pas vizitës te mbretëresha, ku do të pranonte zyrtarisht ftesën për formimin e qeverisë së re.
Emërimet e para të qeveritarëve të rinj pritet të bëhen në orët e vona të mbrëmjes, ndërsa në qeverinë e re do të ketë dhe një post ministror për Brexit-in. /tesheshi.com/
