Nga Mensur Krasniqi
Në një intervistë për gazetën maqedonase “Dnevnik”, një nga bashkëpunëtorët më të afërt ushtarak dhe partiak të Ali Ahmetit, tani më themelues i Partisë së re “UNITETI”, ka akuzuar rëndë BDI-në, se nuk mund të ndryshojnë tre emra të shkollave e lëre më të zbatojnë Marrëveshjen e Ohrit.
“Si Shqiptar ende nuk jemi të barabartë dhe për këtë ka shumë shembuj. BDI për katër vite nuk arrin të ndryshoj tre emra të shkollave ku shumica e nxënësve janë Shqiptar, gjegjësisht nuk mund ta realizojnë të drejtën e fituar pas vitit 2001. Kaluan 15 vite nga Marrëveshja e Ohrit, ndërsa me realizimin e të drejtave ende jemi mbrapa. Gabim i politikanëve është se thirren në Marrëveshjen e Ohrit, e ai tashmë është inkorporuar në Kushtetutë. Nëse Kushtetuta paraqitet si pengesë për realizimin e qytetarëve, mund të ofrojmë edhe ndryshim të aktit më të lartë juridik”, deklaroi Ostreni.
Ostreni nuk ka akuzuar vetëm BDI-në si subjekt politik, por edhe funksionarë të lartë të kësaj partie për involvim në krim dhe korrupsion, mirëpo pa përmendur emra. Sipas tij ka prokuror special dhe ai duhet të merret me krimin dhe korrupsionin e funksionarëve. “Unë supozoj se ka funksionarë të korruptuar nga BDI, por nuk është punë e imja të sugjeroj”, tha mes tjerash Ostreni.
I pyetur nëse ka njoftuar Ahmetin për braktisjen dhe formimin e partisë së re, ai sqaroi se ka pasur bisedë paraprake me Aliun, dhe se nuk ka besuar në atë që BDI-ja mund të riorganizohet dhe të reformohet.
“Ne jemi miq të vjetër. Ahmetin e kam shumë të afërt. Biseduam. Ai mendonte se BDI mund të riorganizohet, të sillet në gjendje për plotësim të qëllimeve programore. Unë jam i bindur se partia nuk mundet të reformohet, nëse Ahmeti mundet le t’i zbatoj reformat. BDI ka probleme kadrovike dhe konceptuese. Por me Ahmetin do ngelim miq. Nëse kemi qëllime të ndryshme, nuk domethënë se jemi armiq. Do vazhdojmë secili në drejtim të vet, e koha do dëshmoj cili ka pasur të drejtë”, shprehet Ostreni. /tesheshi.com/
