Nga Blendi Gashi
Themelimi i ushtrisë është premtimi i madh që po bëjnë kandidatët për kryeministër të Kosovës në fushatën parazgjedhore. Ndërsa Albin Kurti i VV-së dhe Avdullah Hoti i LDK-së nuk kanë dhënë një datë se kur mund të formohet, më konkret është shprehur Ramush Haradinaj, kandidat i “koalicionit të luftës”, duke thënë se ushtria do bëhet brenda 90 ditësh, pasi të bëhet kryeministër.
Edhe pse i vetëdijshëm se presidenti Thaçi dështoi ta bëj ushtrinë pasi deputetët serbë nuk iu dorëzuan, ndërsa ndërkombëtarët kategorikisht u shprehën kundër që të bëhet përmes ndryshimit të ligjit, Haradinaj, ka thënë se do të tentoj t’i bind serbët e Kosovës, por nëse kjo nuk do të arrihet, qeveria e tij do të gjejë mënyra tjera për të arritur këtë qëllim, por pa treguar si do veproi më tutje.
Pas kësaj deklarate të Haradinajt ka ardhur dhe reagimi i shefit të ashtuquajturës Zyrë për Kosovën, Marko Gjuriq, i cili ka thënë se nuk do të ketë ushtri të Kosovës pa “tradhëti” të serbëve.
“Për realizimin e këtij plani, shqiptarët duhet të ‘blejnë’ së paku katër nga dhjetë deputetët, sa i kanë të garantuar serbët në Kuvendin e Krahinës”, ka thënë Gjuriq.
Por a ka gjasa të realizohet premtimi i Haradinajt për bërjen e ushtrisë nëse vije në pozitën e kryeminsitrit, duke parë se serbët vështirë do ndryshojnë qëndrim kur dihet se zbatojnë urdhërat e Beogradit?
Ja ç’thonë ekspertët e sigurisë
Njohësit e fushës së sigurisë ndonëse pranojnë se themelimi i ushtrisë mund të jetë ndër vendimet e para të qeverisë së re, por thonë se vendimi duhet të bëhet në koordinim me miqtë ndërkombëtarë dhe assesi pa lejen e tyre.
Burim Ramadani, ekspert i sigurisë beson se e vetmja rrugë institucionale për themelimin e ushtrisë është zbatimi i një qasje gjithëpërfshirëse, debatuese, dialoguese dhe e përbashkët.
“Besoj se viti 2017 është viti i Ushtrisë së Kosovës, por për të arritur këtë duhet të ndërtohet platformë e përbashkët midis të gjitha institucioneve të Kosovës, platformë qeveri-opozitë-shoqëri civile, platformë Kosovë-SHBA-NATO. Pra, e besoj si të realizueshme nëse do të arrihet qasja e përbashkët”, thotë Ramadani për tesheshi.com.
Eksperti tjetër i sigurisë Hajrullah Tërrnava, premtimet nga partitë poitike për bërjen e ushtrisë i sheh më shumë për përfitim të votave.
Ai kujton se bërja e ushtrisë është e lidhur me Kushtetutë që serbve ju jep kompetenca të medha, dhe ata janë që e pengojnë formimin e saj.
“Nuk duhet të harrojmë se në formimin e ushtrisë duhemi ngusht të bashkpunojmë me faktorin ndërkombëtar, pra me SHBA-ë, BE-në dhe NATO-n, pasi pa ndihmën e tyre nuk mund të realizohet. Faktori ndërkombëtar e ka mundësin që t’i bind edhe pakicën serbe ta votojn ushtrinë”, thotë Tërnava për tesheshi.com.
Drizan Shala, po ashtu njohës i sigurisë mendon se procesi i transformimit të Forcës së Sigurisë në Forca të Armatosura në aspektin politik mund të realizohet pa problem duke filluar që nga dita e dytë qeverisjes.
Sa i përket pakicës serbe, Shala mendon se kësaj radhe do jenë më koperativ në këtë proces.
“Një gjë mos të harrojmë, çdo lider ka karizëm të vet lidershipi dhe pa dyshim që me qeverisjen eventuale të z.Haradinaj edhe partitë të pakicës serbe do të reflektojnë”, thotë Shala për tesheshi.com.
Kujtojmë se këtë vit Thaçi krye në vete mori një iniciativë të themeloi ushtrinë për çka mori përkrahjen edhe të partive opozitare por pas presionit ndërkombëtar u tërhoq të cilët kategorikisht pohuan se ushtria nuk mund të bëhet pa votat e komunitetit serb. /tesheshi.com/
