Nga Blendi Gashi
Çështja e shndërrimit të Forcës së Sigurisë së Kosovë (FSK) në Forca të Armatosura (FAK) – ndryshe ushtri e rregullt – pas tensionimit të situatës dhe kërcënimit me luftë nga Serbia, është rikthyer si temë kryesore debati në skenën politike kosovare.
Të përballur me kundërshtimin e Listës Serbe për ndryshimet Kushtetuese, gjë që do të çonte në formimin e ushtrisë, institucionet e vendit nuk e përjashtojnë mundësinë që një gjë e tillë të bëhet përmes ndryshimit dhe plotësimit të ligjit për FSK-në, duke mundësuar rritjen e kapaciteteve dhe buxhetin për këtë forcë militare.
Kjo ide është hedhur kohë më parë në tavolinë nga deputetja e LDK-së, Vjosa Osmani, që më pas u përkrah edhe nga disa koleg të saj deputetë por jo vetëm.
Nuredin Ibishi, deputet i së njëjtës parti, në një intervistë dhënë kohë më parë për tesheshi. com deklaroi se “derisa pala serbe nuk ndryshon qëndrim e vetmja mënyrë qe vendi të bëhet me ushtri është të amadanmentohet ligji për FSK-në dhe kjo jep mundësi që të inkopurohet rritja për 9 % e buxhetit, që nënkupton rritjen edhe të personelit të FSK-së edhe efektivave dhe aspektet tjera zhvillimore”.
Edhe ish-komandanti i përgjithshëm i FSK-së, Kadri Kastrati, ka shprehur mendim të njëjtë se ushtria mund të formohet edhe pa “Srpska”-n”.
“Qeveria dhe Parlamenti mund ta bëjnë këtë në bashkëpunim me partneritet ndërkombëtar dhe pa e ndryshuar Kushtetutën. Le t’i mbetet emri Forcë e Sigurisë, por forcës së tanishme t’i jepet misioni ushtarak dhe nga ai mision të dalin detyrat, me armatim dhe pajisje të reja që do t’i duhet që të ecë përpara e të mos rri në një vend siç është duke ndenjur”, tha Kastrati në një prononcim për televizionin publik.
Por ideja që ushtria të bëhet me ndryshim të ligjeve, siç duket nuk po përkrahet nga ndërkombëtarët të cilët kërkojnë që një gjë e tillë të bëhet me votat e deputetëve serbë, andaj siç duket qeveria dhe kuvendi nuk po ndërmarrin veprime për të ndryshuar ligjet.
Është vet sekretari i ri i Mbrojtjes së SHBA-ve, James Mattis, që fundmi haptas shprehu qëndrimin e administratës së re amerikane për themelimin e ushtrisë, por kërkoi që një gjë e tillë të bëhet përmes institucionit ligjvënës.
“Forca e Sigurisë së Kosovës duhet të marrë mandat për sigurimin dhe mbrojtjen territoriale, një ndryshim që do të kërkojë edhe ndryshime kushtetuese me mbështetjen e Parlamentit”, tha Mattis.
Andaj, duke parë këtë deklaratë të SHBA-ve, qeverisë i mbetet të punojë dhe të bindë deputetët serbë që të japin votën e tyre, në të kundërtën themelimi i ushtrisë siç duhet do marrë kohë dhe ka gjasë të mos ndodh as me qeverinë Mustafa.
Çështja e formimit të ushtrisë u premtua nga Hashim Thaçi gjatë vitit 2014 kur mbante postin e kryeministrit, por që dështoi për çka fajësoi opozitën.
Ndërkohë, për t’u bërë ndryshimet e nevojshme kushtetuese, kërkohen 2/ 3 e deputetëve. /tesheshi.com/
